Marketing
ODE, BARBA BOŽO !
- Ni vrag da si se prestraši pisat, od kada san ti reka da pišeš pizdarije? Još si to i na internet stavi ca san ti reka.
- Nisan se prestraši, nego san se štufa pisat i sve više se pitan, ca se ja zajebavan sa ovin pisanjen.
- Ne budi mujen, nastavi ti pisat, meni se pjaža to ca pišeš o našin judima i našen gradu.
I dok smo ovako nas dva čakulali oko moga pisanja, zazvoni telefon i zove me jedan Barbaćanin. I on čita ca ja pišen i oće me angažirat oko ujedinjenja svih nas na otoku, pa bi ja doša kako neka potpora. Nisan razumi do kraja ca mi oće reć, ali san mu obeća da ćemo se nać na piće jer preko telefona se o tome ne govori. Vjerujen da njegove namjere nisu loše, jer mu znan oca i mater. Mater mu je smanon radila, pa verujen da to ni nešto falšo. Vidit ću ca će on reć, pa ću Vas o svemu obavijestit.
Kad san doša doma zove mat da je umra barba Božo. Malo me je to strenulo.
Criti san se sa Andreom prije blajdani, pita san ga za oca i reka mi je da je dobro. Još san mu reka neka ga puno pozdravi. Obeća je da oće. Ca se to unaglo dogodilo?
Govori mi mat, da mu je navecer bilo loše i da se više pomoć ni moglo.
Ode barba Božo Bercić.
Barba Božo je pervi rojak mojoj pokojnoj nani Katici Lučinki. Moja nana Kate, kada se pozakonila i došla u Madonovu kuću, u ulicu je živila sa dvi tete. I sa ocevom sestron, materon od barba Bože, teton Marijon Lučinkom i drugon teton Anticon Telerovicom, ka je bila pozakonjena u Oguića. I jedna i druga teta su joj stale kuća i kuća. Kakva je to sudbina.
A, da sudbina bude još veća, brat od tete Antice Telerovice, se pozakoni za 'ćer od tete Marije Lučinke. Tako da je barba od moje nane, Vicenco Teler, pozakoni njezinu pervu rodicu tetu Ružu Berciku, sestru od barba Bože.
Tako je Šime Teler mojoj nani Katici, sin od perve rodice i pervi rojak po ocu. Dali ovo morete razumit. Uvik u svojin tekstovima napišen da će stariji Pažani ovo razumit, jer mlajima ovo teško da se more objasnit. Da Ti neki more bit i pervi rojak i od perve rodice sin, sve u istoj osobi.
Popodne kada san i njemu i teti Nevenki ka je isto na terapiju kod mene, ovo pripovida na posal i jedan i drugi su me bledo gedali.
- Dali ti to Branimir ispravno govoriš? Pita me teta Nevenka.
- Dobro da si mi kazao za Božu, idem odmah na poštu tu preko puta tebe, da Tatjani uručim saučešće, jer smo mi bile dobre prijateljice.
- Ti si Bebiću popizdi, kako je to moguće?
- A, vidiš kako je moguće. Moguće je puno toga u Pag, pa je tako i to moguće.
Nakon puno analiza ipak smo došli do kraja i složili su se na koncu smanon, kada san in lipo sve rastumači.
- Jesi vidi Bebiću kako je Božo lipo glumi sa klapon "Sol". Jako lipa pisma i meni se ta pisma najviše pjaža.
Teta Nevenka mi dalje govori kako su dečki iz klape dobri sa njenin Damirom, a ovaj Barbaćanin ca me je zva, govori mi kako mu je klapa "Sol" pivala na pir. Ovo da coviku ispripovidaš nebi virova.
Onda njima dvima nakon toga spomena govorin, a sada čuhajte ovu polentu, kada smo već kod klape "Sol".
Sin od pervog rojaka barba Bože, Dražen Luča piva tenora u klapu "Sol", a Dariu Tonu je pranana bila Telerovica, teta Mare ca je bila u Bakca ka je nacinjala ruke i noge, a Jurica je pozakoni nuku od tete Antice Telerovice.
- Daj, Bebiću oćeš fermat više, skroz si nas popizdi sa svojin rodon. Ja ovo ne mogu verovat ca ti govoriš,a li je sve jušto.
Barba Božo će zasigurno ostat ovjekovječen u fantastičnom spotu pisme "Teštament", klape "Sol". Klapa "Sol" je odabrala pravu osobu za tu ulogu i barba Božo je to fantastično odradi.
Moj otac je osta bez svog prijateja iz mladosti.
Zato verujen da je barba Božo prije nego ca je parti napisa svoj testament.
Pokoj Van vječni dragi barba Božo i za rastanka ću prošapjat rici:
Prija neg je zdaha i put neba zaplovi
drhtavom je rukom sve nas blagoslovi
Tiho, potli zadnjeg svetog sakramenta
prošapja je rici svoga teštamenta.
Ostavjam van ime i kuću od poštenja
najvridnije blago mojega živenja
Još kad vode vidin vaše lice milo
znan da radi toga živit je vridilo.
Cuvajte mi dico more i gajetu
Dalmaciju zem'ju, našu viru svetu,
Molite da duša fini mi u raju
zbogom mili moji držte se kuraju.
Post je objavljen 10.01.2014. u 00:38 sati.