54. LITNJI PAŠKI KARNEVAL

Marketing

Ca da pišen o 54. litnjen paškon karnevalu. Bilo je veličanstveno, bilo je fantastično, bilo je europski. Da tako daje pišen pita bi san sebe: jesi popizdi? A,da opet ne recen da ni bilo tako, opet bi laga. Svi portali su donili izvješće o karnevalu, pa da ga ja prepišujen, nema smisla.
Moja mat, o tome postoji post na ovon blogu: "Uvik spremna" od 22.01.2013., ni bila mirna dok ni našla robicu da obuce unuka, zadnjega po redu u narodnu nošnju. Tri dana je to parićevala, šila, prekrajala, nadodavala, jer se tako mala robica jedva najde. Obukla se ona u starinski fuštan i pravac povorka. Neću više ništa govorit, samo ću ispratit sa slikamin jer one govoriju više od besed. Uživajte i najdite se na ovin slikamin.
Ovako je pocelo, nana parićiva Matea.

Mat pomaže nani da Mateo izgeda kako Bog spada.

Kaporan je na mistu.

Još da zavežemo facol.

Teta je došla pomoć namestit kapicu.

Lipo mi izgedaš, nana je zadovojna.

Jedna slika sa nanon i dedon, Mate senior i Mate junior.

Teta Marija Bebike iz Amerike, stila je jednu sliku sa najmlajin Maričevićen.

Partili smo nas dva na rivu.

I, nuka je parićana za povorku, pa da odgoj ni odgoj?!

Otac se sti slikat smanon.

Nisan moga materi prevridit, pa san i sa njon ucini jednu sliku.

Ca nisan šesan, taman san prohodi a već u kolo!

Ki ste Vi sa tin bandiramin? Ja Vas ne poznivan.

Je se vo' princ karnevala doša poklonit meni ili ja njemu ?

Daj vamo taj bubanj, da ja dva-tri put udren.

Ki je ovaj, sa ovin mlacićen ?

Ca tata Jasenko oće sa ovin aparaton, veći je od njega ?

Madonovi, i nana Madonko, jacji san od Vas !

Kako to tata, da se ove dvi tete zoveju Marije i kako jedna more bit Bilkovica a druga Fabijanika ?
- Kada naresteš ću ti objasnit, sada muci više.

Zac se svi kupiju oko ovoga covika, ki je taj covik?
- To je novi gradonačelnik, mali moj, kako se nećeju oko njega kupit, kada je sad kasa u njegovin rukamin.

Tata ca si popizdi, ni ti dosta, nana je rekla da vamo dojdeš.

Zac njih toliko slikivaš, ubit će te mat ?
- Smanon su u škulu hodile, mali moj. Pogedaj ti tu lipotu, a već i nana ima meju njima.

Teta Vesna me došla pozdravit, prije nego ca povorka parti.

Nana mi je rekla da je ovo teta Mandica u Burina.

Govori nana da ove tete pivaju sa njon u cerkvenom zboru.

Stali smo ispred gradonačelnika prije nego ca partimo prema pijaci.

Misli san da san najmlaji član povorke, ali me pretekla mala od tete Marine i Marina Fabijanića.

Ovo je njezina nana sa lepezon, tako mi je otac reka.

Peružinke deržiju sve pod kontrolom dok ne partimo.

Vođa ceremonije i paške glazbe je spreman.

Došli su nan gosti iz Donjih Kaštela, zac nisu došli oni iz Gornjih?
- Mali muci više.

Ca sve Egipćanke ovako izgjedaju, ca govoriš tata ?
- Reka san Ti da muciš.

Kako je lipo vidit ovi žuti cvitići, baš su slatki.

Bandira Družine je parićana, znači da bi se moglo partiti put pijace, judi nas cekaju.

Barjaktari su parićani i pomalo parćujemo.

Princ karneval i pučki sudac su parićani, da povorka parti.

Tonči Kabanica mi je reka: - da me nisi zaboravi stavit na blog.

Družina je spremna da pokaže svu raskoš naše nošnje.

Ne moren reć da je najstariji u povorci, ali je najstariji glazbar, legendarni barba Ante Burin – "grata-pinjata".

Uvijek vjerna publika, ili oni ca škvadrivaju?!

Sve versti nošnji, i za šajdan i za blajdan i Mateo sa njima.

Paška glazba na čelo povorke.

Rekli su mi da su iz Stankovaca, blizu Šibenika.

Još malo kako je izgedala povorka i ki je sve sudjelova u njoj.

Barjaktari dolaze na pijacu.

Ganjašinovi brineju o ozvučenju, pomaže in Buro.

Oni najvažniji su zauzeli svoje pozicije na binu. Onaj ki cuva kjuc, on ki ga mora predat, on ki će preuzet vlast u grad, i on pod cigovin blagoslovon sve mora proć.