Marketing
FINILI SU MARE BALI !
Kako me bolest prikovala za postiju, jednostavno sam propusti more događanja ka su se ovi dani dogajala, a vezano za moj grad i kraj "Paškog zimskog karnevala". Nema većeg bogastva od zdravja. Sve poslove ke san mora zgotovit, ostali su netaknuti. Pa da je skupo ulagat u svoje zdravje?! To je najjeftinije, jer samo zdrav covik more donit dobro, bolestan nikome ništa, a najmanje sebi.
Skinu san novi "Baš nas Briga" sa novog istoimenog portala, na kome više neman nikakvog utjecaja, ali sve jedno moj mali doprinos u ovom zadnjem listu, mogli su se ucint toliko obazrivi i poslat mi jedan primjerak. Imam ja ovoga on-line, ali kako je ono Izet reka u "Lud, zbunjen, normalan": "kako ću na zahod čitat novine sa laptopa". Za stari portal san Kaldu da primjerke "Baš nas Briga" ke' nanka Stipe Koren ni ima.
Ovo je već stvar ukusa i/ili kulture ili paškoga: "aj se jebi". To mi je tako drago, i lipo, i vidim da se ni najveći oponenti ca se tiće, kada neki drugi nešto ucini, po tom pitanju nisu maknuli daje od svoje sjene. Ti ćeš meni mujenjace od gore matere i još gorega oca govorit kako i ca mi je cinit. Ti, ti odi lipo ća da te ne zisujen ili da te ne zakunen. Ca me gedaš, oćeš pervu: "padavica te uvatila". Vidi san koliko je naroda bilo na posljednji ispraćaj Marka. Ca reć? Ca je to sve naroda ca u Pag žive? Kada će se tornat ova vrimena sa slik, mislin na karneval?!
Pa kako da se onda u svoj svojoj bolesti ne smijen, a ne mogu se ni smijat, jer mi persa nabijaju kako motokultivator.
Zovem oca i mater, na dan svetog Valentina jer je taj dan mome ocu bilo 81. godišće. Moj otac je poce nosit deveti križ i jako san sretan radi toga. Još jedan od Zorićevih-Bebićevih kome je to pošlo za rukon.
Znan da je barba Šime živi više od oca mi, ali neznan koliko je živi barba Osip. Triba bi pitat Barbira ili Galića. Taman kada je mat stila dat slušalicu da čestitan ocu, govori: "Evo, doša je Valter". Baš mi je drago. Znan koliko to ocu znači. Govori mi Madonka daje: " znaš da je cera doša sa slikon da mu recen ki su na tu sliku, da to zapiše. Odi lipo zbogom, molin te, sada kada će pocet povorka, ti si meni doša da ti pokažujen ki su na toj sliki. Ca si ti pomunješa, oli si doša provjerit ako san se maškarala. Da je mene voja, ja san za pet minuti parićana. Ma jesi vidi sinu moj, ca je njemu došlo napamet. On Tvoj brat! "
Ipak mi je najviše žal, ca nisam uspi vidit izložbu "Pag srednjovjekovni grad" u Narodnoj-gradskoj čitaonici u Riku, jer ono ca san pošpija kroz zatvorena vrata dalo je slutit da bi to tribalo vidit.
Pored mejlova kih dobivan, dobi san jedan di me obavješćujeju da je dignut novi foto-blog www.pagdanas.com . Meni je to jako drago, imat će moju bezrezervnu podršku kako i svi ki su provali ucint nešto za naš grad na ovoj globalnoj mriži.
Evo i danaska zadnji svetac od one naše: "Kandalora snig do mora, sveti Blaž da je laž i sveti Šime još je zime". I bome, još je zime i još uvike je hladno i ona, da je febrar najhladniji zimski misec.
Svi tekstovi ki su bili parićani za Iskonskipag su stavjeni u stranu, jer neke je i vrime pregazilo, ali nima straha, kada uvatin malo više force gremo naprid.
Stojte mi dobro svi Vi ki ste cekali i cuduli se ca se dogodilo, ja san u išćekivanju one nagrade ka' se dilila na "sociji", oni roži u tašku od porculana.
Ako ikada buden u priliku dobit to priznanje to će bit znak da u sveti Karen triban organizirat onih ki ćeju morat ploču od groba dignut, da me se stavi unutra. Zato se ne prešite.
Do čitanja, zbogom!
Post je objavljen 18.02.2013. u 21:14 sati.