Marketing
ODE LITO,VILOVITO !
Pasalo je još jedno lito. Kako se vrimena minjaju, tako se i odnos prema moru promini. More je sad dobilo veći znaćaj u turizmu nego u svim drugim djelatnostima. Recimo ribarstvu, salbun se je vadi od mora, navigalo se, roba je cirkulirala moren i da ne nabrajan daje. Sada mi u Pag još uvik nismo nacisto, triba prokopat taj kanal od Košina ili ne?! Oni ki sada brojiju šoldi zarajenih od turistov, i najveća in je briga u ku valutu pretvorit dobit, dali u Euro, švicarce ili možda u dolare, oni su sigurno za to da se taj kanal prekopa. Ca više turistov, to više šoldov i logika je jednostavna.
Ionako onaj kanal od Magažnarove kuće do svetog Gergura i nima neki veli značaj, nanka se ono «ilo» ne koristi previše, a po svojin svojstvima je kvalitetnije od onoga u Lokunju, ca puno svita ni nezna.
Ki mi je to reka? Rekla mi je pokojna doka i ne samo rekla nego i pokazala te studije. Di je to sveršilo i kod koga je to, ja neznan. Ovi ca sada kuriju da se napravi nova «Lokunja» morali bi doć do tih spoznaja, i nikada in nebi palo napamet kopat kanal, nego bi sve ucinli da se taj projekt realizira pa da Pag bude poput Vele Luke di san pred trejset godišć poca radit u jednoj takvoj Ustanovi ka celo godišće radi. Ali pustimo sada to, o tome neka glavu razbija gradsko poglavarstvo, a mi svim silamao poduprimo da se taj kanal nikad ne izgradi za bilo ko dobro. Jer dobro ni uvik bilo za svih. Samo su neki uživali u dobrome. Namin je bez kanala najboje i sviman nan je dobro, zato se nedajmo prevarit.
Turistov fala dragom Bogu, još ima bez kanala, ca je za naše paške prilike ipak ono ca nas veseli. Noga puta se znalo reć, da posli Vele Gospe više nema lita. Još bi, di kadi bi ki turist i to bi in se cudili koliko su dugo ostali u Pag. Ca Vas vrag ne nosi ća, lipo bi in znali reć. Posli Vele Gospe već bi bacve i štaćice bile poštivane po Katinamin, pomalo su se štanjivale a judi su se parićivali za terganje.
Jesen je došla, dica su partila u škulu, judi su već pobrali svoje jesenske plodove. Grozje se potergalo, ako ga još di ima i već se misli kada rakiju skuvat. Sve čari jeseni su ispred nas. I premda nas je ovo vrime svih iznenadilo, ne more se reć da se ne ćuti jesen, ako ništa drugo ono vecer, kada se bez dugih rukavov više ne more.
Dok sunce zahaja za Caskon umore, a paške kuće obasute su ognjenim zracima sunca, «babje lito» se rece, zracima boje zlata, i di se mladost još bezbrižno kupa, a cujemo da ima i starijih ki su se okuražili obanjat se. Zvonik Vele crikve poprima drugaciji kolur, a burin se okriće prema kraju, šinjal je ribarima, pogotovo onima ki greju na lignje, da pripreme alate i kaiće za noć u paškoj vali ili kanalu.
Oni ki su parićali derva za grijat se, su mirni, oni ki nisu neka požuriju jer će kiše i hladnoće berzo doć. A, tad će Pag utonut u svoj san do drugog lita, u stihovima pisme.
Kad će lito doći
Ja ću na Pag poći
Di ružmarin cvate
Sol i sir se najde
Jedrilicon poć ću
Na Tri glave
I u Casku
Kada sunce grane
Post je objavljen 25.09.2012. u 17:01 sati.