Pregled posta

EVO ME DOMA !

Cetvertak; 7.06.2012.

U cetvertak na Tijelovo san doša doma, baš u vrime procesije, Ross nas izvjestila i tekstom i fotografijama na svon Blog, i pofalila se kako su njene koltre najlipše koltre na barkunima. Jako je lipo da se običaj ne satere. Koludrice su zadržale svoj nivo i neka ih. Detaljno izvješće san dobi kad je Madonka došla doma.

Katolička crikva na pervi cetvrtak nakon nedije Presvetog Trojstva slavi Tijelovo, svetkovinu kada se procesijom kroz grad javno svjedoci vjera. Tijelovo je jedan od cetiri zapovidnih blajdana Katoličke crikve, i pomice se ovisno o Uskersu i uvik se slavi u cetvertak nakon svetkovine presvetog Trojstva.

Petak; 8.06.2012.

Sutra dan mi mat govori da bi bilo lipo da pojdemo na sprovod, da je umrla neka najstarija paškinja u Riku, ka' je imala 101. godišće i da joj je to školskoj prijatejici teta, ka ju je nastojala. Vidin da paški lokalni mediji taj podatak nisu zabilježili. Valjda ta paškinja ni bila titulana pa su je preskocili. Pa kako je sprovod za sprovodon, da bi bilo lipo da pojdemo. Govori daje mat: „ti si sa Ivon Hrabrin, bi sused u ulicu, pa bi bilo lipo da pojdeš za sprovodon“. Di neću poć, tin više ca mi je o smerti reka njegov brat Ante, ki je ovi dani baš bi na terapiju kod mene.

Taman kada smo došli na cimitar parti je pervi sprovod i Madonka je odma požurila da pojde za sprovodon. Sve je ovo ca se tice Paga zamene novo. Poć auton na sprovod.



Zadnjih par godišć sprovodi naših najmilijih, prijateja i poznanika sve više slićiju na sprovode u velikon gradu. U ovo vrime auta i mobitelov sve je manje slobodnog vrimena, sve cešće nan se preši. Još do pred malo vrimena dok Pag ni ima mrtvačnicu, sprovod je parćiva od kuće umerlog prema Cimitru. Danaska to zvuči gotovo nevjerovatno, ali tako je bilo. Ja se sićan čak kada se mertvo tilo naruke nosilo i sićan se da je sestra od barba Rika od Burinova roda, perva se vozila u kolica, ka su se tada narucila za vozit mertvo tilo. Za to je najviše bi zaslužan barba Levro ki je doša od Amerike i sti uvest tu novost, ku su kako sve u Pag, neki poderžali a neki popjucali. Na kraju se ipak ispostavilo da je boje mertvo tilo vozit na kolica, nego se prebijat naruke nosit.

Sutra će te ponit
Njih šest meju ruke.



Sprovodi su onda trajali i po dvi, tri ure. Pitat će te se kako? U kuću se cekalo popa da dojde, on ki je sti popa. Onda dok je pop svoje odmoli doma. Ženske su morale narikat i oprostit se od mertvog tila. Mora se stvorit red u ulicu, ki će nosit đerlande, ki će nosit cinguli, ki nosiju mertvo tilo, vezat in cerne kurdele oko ruke. Tek bi onda parti sprovod. Na čelu sprovoda ili križ ili lopata. Ka, lopata? Tako se zvala daska na ku je pisalo ime i prezime onoga koga se zakopalo. Mi smo u fameju imali i križa i lopate. Normalno da on ki je umra sa križen, se šlo u Velu crikvu. Dok nisu došla ta famozna kolica, časne bi nacinjale stoli na ko bi se položilo mertvo tilo. Dok bi pop reka misu, najmanje tri kvarti od ure.



Onda cela ta povorka Velon ulicon gori ubrig. Ako je sprovod pratila glazba, još je to dodatno usporavalo sprovod jer se hodilo sa takton kako je glazba svirala. Možete sebi dočarat taj ritual u vrime dok je bilo lito? Bila je to priredba na otvoreno. Zamislite, on ki je umra na Vodice u sercu lita, pa ta povorka pasat pored plaže. Vamo svi u veštiti, na plažu svi goli.



Kako glazba više ne svira na sprovodima ili barem ne onako kako je prije svirala. Na ovaj me tekst baš potakla glazba, kada san vidi da se glazbari skupljaju na groblje. Možda je to bilo iznenađenje i za ostale ki su bili na sprovod.



Uređenjem mrtvačnice svi ovi običaji su išćeznuli.
Međutim, tukalo me sa rojakon Jasenkon nosit đerlandu. Tako da san ne računajući nosi đerlandu. Nakon sprovoda pitan Jasena, dali se još dajeju ruke. Govori Jasen da ni toga više nima.
I to je bi del rituala, zato ca se posli sprovoda, ili u ulicu ili ispred svete Trojice napravi red di se muškon delu fameje davalo saučešće, kako se znalo reć: „ajmo dat ruku“. Kada bi se dala ruka, obično se sveršilo u nekih od obližnjih kafića a najviše u „Gabelu“. Tamo se odigra treći čin sprovoda.
Tako ni sprovodi u Pag više nisu ca su nekad bili. Ni mi krivo, pogotovo kada je lito i vrućine. Moramo hodit naprid. Ovaj me sprovod od pokojnog suseda Ive podsiti na to. Mene je jedino obradovala to ca san tamo criti svita, koga verujen nebi criti za ovo kratko vrime dok buden doma.
Nakon sprovoda niti svi judi nisu ostali na misu ka je bila za pokojnjaka. Svi se pokrcali u auta i svaki svojin puten.


Post je objavljen 12.06.2012. u 14:14 sati.