Marketing
A.C.A.B. little tomorrow
Nedilja, vrime lipo ka u priči, posli obida, grijota bi bilo ostat u kući. A vanka cipa zakasnilo „sunce marčano“, tuče u možđane. Bile su Vinkica i Zakonita prošetat, pa su se vratile dišuć na škrge. Kako pomirit te dvi kontre? Ne ostat u kući, a ne cvarit se na suncu?
Neš' ti problema, bar u današnje doba. Ionako san se mislija zaletit na sajam automobila u „City Center One“. Da vidin i to čudo neviđeno, ne moreš njanci paštetu otvorit a da ne iskoči koji njiov reklamni spot u ove dane.
Iša, povirija, i kad san se već sprema konstatirat „žali Bože potrošene benzine za doć ovamo“, prst sudbine se umiša ...
Došli mi do štanda naše drage policije, a tamo jedna smišna mlada teta odgovara na pitanja radoznalaca, pomaže dici da se uspenju na motor, zapela je i Vinka, ali u to se, ka po dogovoru, stvorilo po sela. Mašograda, da ne bude zabune. Jerbo su oni drugi klase Ogorje & co. već odavna spojili produženi vikend i sad uživadu u blagodatima friške vlaške arije. A ne ka mi, šetat okolo po trgovačkome centru i vižitavat aute koje bi mogli kupit eventualno ako bacimo dikod mrižu pa u nju inkunja bar po duzine zlatni ribic.
I neka mi neko reče da naš svit ne voli policiju. predočavan materijalne dokaze da su to zlobne insinuacije, kako za mlaje, tako i za stariji svit ...
Bilo je stvarno dosta tega za vidit. Ali ... zaludu svi mogući tonobili, od mali gradski, priko oni normalni, pa sve do neprirodni kombinacija tipa Porsche Diesel ...
Isto se najviše svita skupilo oko štanda „plavaca“, neka su samo ovi naši domaći, a ne oni iz Nevijorka. Niko niije trenira strogoću, nijedan drug plavi nije nikoga po glavi, i svi su se miroljubivo, sritni i zadovoljni, razišli i krenili svojjin puten. „Plavci“ zato ča su pokazali ljudima da ne grizu, da su i oni judi od krvi i mesa, sa istin problemima ka i svi mi, a mi ostali guštali makar za momenat zajašit moćne makinje koje ćemo teško moć sebi priuštit bez da Fortuna dobro promiša mac karat.
A nemojmo se lagat, i meni je bilo drago ča san trevija na pravo misto u pravo vrime i uspija to sve litretat (fotografirat, za sjevernjake).
Zdravi i veseli bili! 
Post je objavljen 30.04.2012. u 14:04 sati.