Marinko...Marinkoooo ! Čuješ li me, za Gospu Blaženu ?
Evo odma...Trčin...A ko Vas ne bi čuja moja šjora File...Parite oni najavljivač o makljaže.... ča je nikidan prinosija tuču našega Mirka kontra onoga Mora iz Nove Zelande !
Ma molaj me se tih tvojih zajebancija, vengo ča se ovo dešava ?
A ča to..Ča se već nije i prin dešavalo ?
Bogati, ovo pjuvanje po tebi i spliskim esdepejcima ! Ne moš otvorit njanka i najgore foje a da te ne štracaju..Ka da su svi mužikanti o istega orkestra i da jin zapovida isti meštar o dirigenta.
Annn, na to mislite ! Nećete Vi novitade - ka da me i prin nisu pjuvali i najmanji ušenci i čimavice o falši novinari. To Van je zanavik isto: Mali su mali i ostat će mali a Velikima se ni potriba poć kurbat i prodavat jerbo su oni Veliki i moš jin puvat u onu stvar.
Ma znan ja to, vengo me moj mali izludija pa da te pitan ovo, pa da te pitan ono..On se, bidan, sramuje a sve ga interesira. Znaš i sam kakvi je - ka curica !
Neka njega...Dobar je on. Lip je ka pupa !
Ma je nikako povućen. Ni na mene...Ja bi živa zmaja zadavila i pojila - onako sirovega skupa sa kožon i kanđama.
A to Van svakako virujen !
Triba bi i ti Marinko moj, barem kojega gaštapana marendat !
Nisan lud - pa da me uvati litavica !
Ma dobro. An ke bon....Nego sićan se kad su štampali ono, kako se zvalo....an, sitila san se - VRIME, ne bi li te smantali. A ča nisu vajali u tin novinan...U otemu tjedniku, ni pas s maslon to ne bi pojija...Ma si izdura, evala ti - jer prislano ni maški ni drago - ma oni to ne razumidu. Joli jin fali nika daska u tintaru joli su bidni tek ka niki šegrti o svojih gazda pa su još neuki.
E, moja dobra šjora File - ne more se reč bas za onega Kuljiša da je on niki šegrt. Malo je ka previše ocva za šegrta i vas je nabotija - a stalno me griza za žnjute ka bisni pas. A ča nije izventa o meni ? Ka da je niki pisac o naušne fantaštike !
Je, je - ko bi zaboravija otu čunku...Ma te se "Jutarnji" ne molaje. Jesi li vidija jutros prvu stranicu. Gadidu te kako je SDP spasija Keruma a ti si , ka...izveja nike moše da škapulaš spliskoga potešta.
A zva me mali miljun ljudi i povraća od gadosti !
A ko nebi ? Dunkve - vi ste ostali u gradsku vješnicu...Skupili potpise za referendum o povirenju Kerumu. HDZ nije tija dat svoje cinjene potpise..vengo su šmugnili vanka da ne bi morali glasovat...A opet Vi krivi !
Tako ispada po toj vrsti jubiteja istinite informacije.
A ona će mi Bilać dat sliku....Pobigne - pa per la finta oče minjat dnevni red o pitanju pridsidnice gradskog vića - a vi ste već i oti papir pridali u protokol...a ona s dva hadezeova junaka - kima ...dala petama vitra i sve puton viće: Jurjević je prijatelj o Keruma...eno ga spašava ga, judi moji. Mi zato bižimo iz dvorane. Njima za dišpet - da jin fale naše tri ruke...
Jel dobro govorin...?
Ma ka Sveto Pismo !
A oti falši novinari trčidu za njoj i viču - Tako je gospoja Sanjo...Lipo ste to besidili ! Nećedu nas esdepejski mangupi privarit s tin ča su bili protiv Kerumovog proračun a vi ste glasali za njega. Misle nas uvatit na fintu da su oni potpisali ostavke još prin godinu i po dana - a vi niste tili...Ma sve su to mutna posla. Jerbo vi duboko u sebi rušite Keruma spašavajući ga - samo da bi ga privarili...da se ne dositi koliko ste, u stvari - svin srcen protiv njega.
Tako nekako ispada !
A to ča su se mečili, grlili i jubili na izborima ka da su sicilijanska braća...To ća su bili u koalicijunu i na istu binu skakali i pivali do prije par miseci...e to je tek bila najveća lukavština...E je su furbasti oti hadezejci a niki su novinari omar to shvatili pa udri pjuvat po Jurjevicu....A urednici otakih foji, omar opalili slike o bratstvu i jedinstvi izmedju Keruma i esdepeja - pa su njima drito na prve stranice. Neka vidi narod ko je ko ! Jer raju triba prosvitlit.
Ma svitlidu ka oni živi oganj ča ga je neko užga priksinoć poda Klison !
I još žešće Marinko moj. To su pravi piromani i fanatici ... Ka niki domaći talibani.
Pa di talibani ?
Je, je...talibani - vengo ča ! Niki su se eno čak priobukli i u ženskice pa se ćas zovedu Kristina a ćas nikako po muški. A bez pristanka te pjuvaju po svojin portalima. Pa ti sad budi pametan !? Oni viridu u biljete o tvoji putovanji...pa krešte da je to izdaja, da si spasija Keruma drito iz Teherana. A sve je to samo obišna spiza, kripna hrana....za naivne ! Oni radidu za manču, ka barbiri - a svaki od nji u istu trumbeti puše i sviri ! Svaki u svoje novine. Svaki di more. Ajme jada i mižerje o judi !
Ma ja san Van spokojan...susido moja ! Jerbo uvik će bit i pravih judi, pravih novinara koji če za istinu i svoju glavu na panj stavit - ma se nikad neće prodat. Prez takih ne bi bilo ni demokracije...ne bi ! Nikad to nemojte zaodubit !
A meni dižedu tlak ovi drugi, ovi govnjari...Pa baranko da glumidu kako nisu iz iste mužike. Baranko da i mene ne činidu ludon....Eno čitan i u "Slobodnu"...jutros lipo piše ispod jene slike di su te litratali na jučerašanju sidnicu - kako si reka da su ama baš svi novinari korumpirani.
E, to su izumislili !
Ča si reka ? Da izumislili ? To su ti ga smistili ! Ma ča ji ne daš na sud...pa nek se tamo prčidu i junače....svojin izmišljotinama.
Ma jebe me se za ridikule i za one koji tako uređuju tekstvove o svoih novinari - koji pišu jedno a ovi jin fikaju drugo !
Samo ti pivaj, tico moja, samo pivaj i mudrijaj, A kad ti ga zakalumaju i napišu da si jema firmu skupa sa Kerumon ti se češi ! A ona gospoja ča pari da je učinjena o krokanta - stalno to ponavlja ka da bidna ne more čakod novega, čakod drugega izventat !
Ma smislila je ona kako san i rodbinu pozapošljava drito u Keruma.
Je li to zabranjeno tvojima da radidu. Onima ča su ji hadezejci bacili na ulicu...?
Ma naravski da nije. I nije mi to rodbina vengo tazbina. Zamislite samohranu majku bacidu na ulicu. Javi se na natječaj u općinu...bude prva na listu...jedina jema državni ispit. Nima prigovori - ali anonimci šajedu prijavu policjotima...dolazidu inšpekcije..uskoci i poskoci i ne mogu nać njanka jednu protuzakonitu stvar. Ali za dil naši bajni novinari i za ovu "Gospu o cukra" to je moj veliki zločin...Moj ? A zašto ? Jerbo se žena zaposlila na šalter s najboljin rezultatima na natječaju ! Ali jerbo je to jako važan. skoro državnički posal - šajedu policjote da ispitaju sumnjivce.....a ono, ništa. Biće da san i njih uspija potplatit joli i su njima otvorit niku tajnu firmu !?
Ma lipo san ti ja rekla da su to gaštapani a ne judi ?
A ča su Van se zamirili gaštapani ?
Ha..ha...ha ! Dobro mi i govoriš ! A ja san čuli da bi niki od tih junakov uvatili Boga za bradu da jin je završit fakultet..ma jin ne gre...Nikako jin je tisno u glavuši !
E...pa za takvo piskaranja i ni potriba jamat skulu...Samo more smetat !
Talibani, talibani - sinko moj...Oni su ka niki desperadosi iz oni tvoji ludi meksički filmova....Smiju ti se u facu a onda ti pucadu posrid leđa !
Malo morgen bi jin ja okreća leđa !
E..tako i triba. Vengo vas mi se jezik osušija...Jemaš li kap onega forskega rožolja ?
Hektrovića ?
Aj ne palamudi tot - vengo daj ako jemaš i ako oš !
Omar..omar...urednice moja !
E, kakve bi foje ja učinila - samo da mi je prilika..Boje vengo o pokojnega Kulušića !
Pogledan je prikorno onako iskosa.
Aj..dobro, dobro. Ne bi bile baš ka njegova slavna "Slobodna" iz onih vrimenov - ali Bogami bi bila slišna, puno slišna.
Izvolite, lipa moja vilo !
Uuuuu...Fala in ! Aj, nalij još jednu - priša mi je mali. Ne linčari tot !
Nalijen joj još jedan bićerin a ona ga saspe naglo u grlo nakrivviški glavu unazad i malo se stresne nakon ča isprazni svoj omiljeni nektar...
Brrrrrrrrr ! Ovo je najboje protiv gripe. Jebeš likare ! Aj, gren ja sad poć ča. Puno mi pozdravi Maju i onega tvojega miša ča se obuka u pasju kožu ! A kako mala Hana ?
Ma ka Sunce !
E to je najglavnije....Sve drugo je pizdarije...Viruj mi ! I čuvaj se. Pazi na zdravje - Ne daj se mangupima. Ako triba - samo zovni. Skakaćedu oti talibani ka manekenke po afričkoj žeravi !
Oću, oću...Dobro ste mi pripomenuli.
I ode moja šjora File niz hodnik...sitnim, zvućnim ali čvrstim korakom da nikoga drugoga svituje o tome ča triba a ča ne triba radit u ovemu kompliciranome svitu i životu - a zasebice ovod, u centru svih centara, usrid Splita !
Post je objavljen 13.03.2012. u 22:35 sati.