Južina se prolila cilon Rvackon.
Ne znaš di glava više boli: U Splitu oli u Zagrebu ? Svi su nekako štufi, mrzovojni i grintavi.
Danas u Saboru, nakon jučerašnjeg dana.....i žestoki raspravi okolo rebalansa proračuna - zatišje.
A cili dan su u saborskon Klubu SDP-a zvrljili telefoni...Građani su zvali, bogavali, beštimali i dilili savite:
Te, triba jin reč ovo - te, triba jin reč ono.
Jooooooo......da je mene puštit samo na pet minuti da jin saspen u čunku sve ča ji gre...Jemali bi ča ćut ! I tako bez pristanka do u kasnu uru.
A ja san kasnija na saborsku sjednicu jerbo san ujutro drža konferenciju za novinare u Splitu.....skupa sa pridsidnicima stranaka koje gredu s SDP-om na izbore i sa Rankon, našin kandidaton za spliskog poteštata.
Tuče jugo po onoj mojoj karampani od auta....A on se vas trese i dršće, trza i kotrlja vamo-tamo, ka pijano ćejade kad izgubi busulu...oli kad se malo višje nabumbi.
Uto poćme pljuckat i kišica.
Jo ča mrzin kišu dok vozin !
Brisači mi škripjedu i samo radidu nered po caklu. Razmazijedu krepane muve, leptire i ko zna koje sve bubetine i leptirice ća su se sudarile s mojin tonobilom u zadnji par miseci. Pa caklo pari ka niko grobje ovih pokojnih letečih beštija. Jer ko će dat vrimena još poć prat cakla od auta ?
Proša san tako Zadar...kad ono zatvoren tunel Sv Rok.
Jo, judi moji - da mi je bilo izmirit tlak....Bija je veći vengo u parnu makinju ili kotal o ferate. Parija san Pretis-lonac ! Zamalo mi je para izašla na uši i joči tako da deboto nisan počeja zavijat ka sirena od opće uzbune...
I aj sad na Zaton Obrovački, pa priko Velebita na Gračac....a onda na Sv. Rok i - via Zagreb !
Ko će platit ote gušte !
Gren uzbrdo a isprid mene se namečila dva kamiona s prikolican...pa se ti sad veri uzbrdo ka niki cotavi puž....oli žaba-kornjača.
I taman ja skidan sve svece su nebesa kad zazvoni mobitel. Sva srića da jeman onu žicu u uvu, ka oni čelavi čuvari o slavnih faca, pa mi nije problem pričat.
Ko je ?
Ja !...Čujen ja nikako poznat glas.
Ko to - ja ?
Ma ja, tikvane jedan gluvi...Šjora File !
Dobro se nisam u oti momenat odma strombula skupa s auton niz ono brdo.
A ča zovete ? Oli je kakva nevoja ? Vozin...Voooziiiin... za Zagreb. Ne mogu sad čakulat ! Ni mi zgodno !
Ma koja čakula ? Jeman ti nešto ozbijno za kazat !
Aj, recite onda !
Čuješ, sad san čula na radijo kako Sanader govori da je njegov glasnogovornik oni Mosor....!
Ma kooo ?
Milorad Bibić...cukunu...ča je nikidan kod Stankovića reka da bi se Sanader triba vozit na tovaru kad mu već zamiradu na onemu oklopnemu bemvejcu !
Dobro, dobro....Ni potriba da vićete..Čujen Vas !
Aj nemoj me činit ludon. Neš me se tek tako liberat ! Nego dobro slušaj !
Evo, slušan...!
Kad dojdeš gori u Sabor...reci ti njemu da nas ne zajebaje !
Ma ni Van on u Sabor. Eno govoridu da je u Sisak na niki stranački predizborni skup ! Šuker je u Saboru !
A ča će mi Šuker !? On samo trumbeta po tuđin notama...Ča mu naredi kapo...!
Recite višje..ča očete. Pada kiša. Klizava je cesta. Sva je na buže. Rumbat ću se zaraj Vas !
Aj ne zovi vraga ! Nego slušaj.....Moraš mu nikako reč da zaozbiljno triba vazest tovara za na misto otega oklopnjaka...Ka prvo, jemat će su kin razminit misli...jerbo se s tovaron lipo more pričat ako naučiš njegov jezik...A svi kažedu da Sanader govori toko jezika da je to ćudo jedno !
Jeli Vi to od mene pravite monu ?
Nisan - to su već drugi od tebe apravili !
Fala in, fala...Lipo me ćastite !
Aj, ne moš se višje ni zajebavat....Nego, zaozbiljno - Neka vazme jednega lipega sivca. Znaš kako je ono piva Toma Bebić.... Bog mu da pokoj duši....
Je, baš će me primit u Banske dvore da mu to kažen !
Ma reci ti to njemu u Sabor !
Ali nima ga tamo...Oli ste gluvi !
Ča si nervožast....Doć će on tamo. Kad - tad !
Je, na "prvi livoga" !
Ne boj se...doć će on...kad ti ja kažen. I još će Van jist iz ruke!
Astiga Mande....Otišli ste Vi na kvasinu !
Dobro..dobro ! Sitit ćeš se ti mojih riči...Samo nemojte se onda uvatit na njegovu baketinu pa mu poć virovat, pomagat - jerbo zna taj svakome zamličit oči. Znaš ono, kad mu med počme curit iz justa ! Onda mu najmanje triba virovat !
Pa ste meni došli to govorit ? Znan ga ja ka po šolda !
Samo ti njemu reci da vazme tovara i da mu s obe bande stavi po dva lamarina - a na glavu lonac o lušije. Tako će ga najboje blindirat !
Uto mi taman na jednoj okuci izleti autobus i cili san se stresa o straja..jerbo su mi brenze počele nikako škrokavat i tuč onako: tup-tup-tup...da san se vas uzdršća.
Evo san se zamalo sudarija šjora File ! Ne mogu više govorit. Triban vozit oli ću svršit u Gospić u bolnicu.
Pa ča bi ti falilo ? Tamo ti je oni Milinović šerif..Ajde, lipo bi te pogleda...Pa bi mu mora falit onu reformu !
Šjora File, ja moran fermat...Stojte mi s Bogon....Ne mogu višje njanka jednu rič prozborit...Evo i magle !
Čekaj...čekaj....Još samo da ti ovo rećen. Objasni Sanaderu da tovar jema još jednu veliku pridnost isprid najmodernijeg i najskupjega bemvejca ča ga je Švabo ikad uspija napravit.
A koju to ?
E, za razliku od tonobila - tovar ga more minjat ako se, dikod, razboli oli mu se ne da otić na posal u Vladu !
Šjora File, nemojte samo da Vas kokod čuje !
Jebe me se...Ja san jedna obišna pućka žena i lipo ću jin reč kako jeman prav mislit da narod, ako potla svega još uvik viruje ovoj Vladi, i mirita da jema tovara za Premijera !
Post je objavljen 31.03.2009. u 21:23 sati.