Marketing
Sritan Van Dan Pobjede!
Ala lipoga naslova, malo se pravimo Ingleži pa pišemo Svaku Besidu Velikin Slovon 
Ma ostavimo se mi zajebancije, jerbo su me niki već priduhitrili. Danas je dan Pobjede, i mojoj materi rođendan. Kako je pokojni dida, ili još boje rečeno njezin stric Silvestar, bili vidoviti. Rođena na Dan Pobjede, i zove se Slobodna, ali je rođena četrdesetiprve. Zajebavali smo je prije, za vrime "one" države, da je mogla dobit i Spomenicu, pogotovo kad smo odgledali "Malo misto" i onu legendarnu doture moj, špašiteju moj ...
Eto, današnji rođendan neće proslavit baš u disko-klubu, otvorila je Kavu za razbivat kamence na bubrige i na žuč, pa se mrvicu kaputaje po kući, ali želimo jon svi skupa da se tega ča pri riješi.
Toliko o penzićima. A Vinka? Vinka je deboto ka velika. U nediju smo bili, po običaju, u Kaštila na obid. Zakonita nervozna, nije jon još produžilo ugovor, ronza, izleti i pokoja gruba besida, a mala šefica jon šćeto-neto: Mama, polako govori i nemoj beštimat! 
Najprin smo se svi pogledali, ka ono ne virujemo je li to mala zapravo rekla, a onda smo svi pali po podu od smija. Vinka nas je, narafski, blido gledala, jer je, ka, to ča je ona rekla skroz normalno i ča se mi sad jemamo smijat radi tega 
Svakoga dana me sve više iznenađuje. Nabavija san nove Teletabise, i ona je gleda pa od bote udri u plač! Ča je sad, da je nije ča zabolilo! Ajme i kuku! kad ono: plače zato ča je niki medo doletija i zavrtija se na vrtuljku skupa sa teletabisima. I sad svaki put kad dođe ta scena, moran primotat, jerbo opet udre u plač. Pa ajde budi pametan! 
Lipa su vrimena, grijota je stat u kući, a i u parku su mekli novi tobogan, pa ne moreš proć sa Vinkon priko sela a da se ne spusti barenko koji put nizdol. Zdravi i veseli bili ...
E, ajme, skoro san zaboravija napisat: priča od nedije je ipak završila hepiendon, Zakonitoj su produžili ugovor za cila dva miseca, tako da smo odma otrčali kupit pokaznu jerbo je jučer bija zadnji dan. Jupi!!
Post je objavljen 09.05.2006. u 09:44 sati.