E, sad ćete se vi pitat a zašto ovakvi naslov? Radi rime ... ča ću poć spominjat Valentinovo kad mi se ne uklapa u koncepciju ... mislin glede rime ... A ako ćemo poć pravo i govorit, ovo i je misec od maškar i školskoga lista, našega Mašopisa, a maške su tot samo radi tradicije, jerbo se one, da prostite, natiraju sad priko cile godine i jebe se nji za narodne poslovice.
Eto, objasnija san van i naslov. Da se opravdan ča me nije bilo deboto misec dan. Čista linost. A ča ću se poć pravdat, najlakše je reć istinu. Nego se kasnije mislit ča si kome izlaga, pa se plašit da ne rečeš čako krivo. Šalin se ja, bilo je, fala bogu, puno posla, a da bi moga mislit na ovi blog koji mi, ipak, dođe samo ka rekreacija. Pinezi od Milijunaša su došli, dosta i je već i partilo (dugovi, dugovi...) a triba mislit i kako dalje. Da vas sad ne davin pričan ča mi žena i dalje ne radi, bila je zanji put na zamjeni cili pet dan, i radi tega izgubila misec dan naknade priko biroa ... eto, moraš se javit jerbo te drugi put neće zvat.
Maškare se bližu, barenko ove naše Sućuraške (25. vejače) i pripreme su pri kraju. List, naš "Mašogadur" je iša u štampu, nikima od Vas san ga već i posla na email, a ako koga još zanima, slobodno neka se javi, piza oko 2 Mb čistoga PDF-a. Ma mi se pari da to neće bit sve ... moga bi lako uletit i koji umetak tipa "breaking news" ... sad svi jemadu ništo za kazat, kad je list partija u tisak, a kad san pita jema li ko šta za u list, svi su mudro mučali ... A ovi put mi se pari da ćemo ić i malo dalje.
Ako se ekipa složi, počeli bi, barenko za početak, sa mashogadur.blog.hr i to vrlo skoro, odma posli maškar, a more bit i prije, ko zna ... bit ćete na vrime obaviješteni.
Mala, fala na pitanju, dobro, iako se guza i dalje ponaša priličmo tvrdoglavo. Poduzeli smo i nike korake u ton smislu, bili smo u likara specijaliste, pa je sad pod drugovačijin režimon, spize, dakako :-)
A ča se tiče onoga drugoga režima, morat ću špijat moju mater, tj Vinkinu babu, kako to ona postigne da mala, na moje oči, kad je gori, na uru uzme dekicu i uz "oću spavat" gre u sobu, a ja i Zakonita je ne moremo njanci za uru vrimena uspavat doma, ni u našoj ni u njezinoj posteji. Eto, dosta za ovi put ... sad gren spremat materijale za školski list. Pitajte me di je mala? Spava, u babe ... ako je ne mores pobijedit, pridruži in se :-)) U vrime od spavanja je odveden gori, ona ubije oko svoji par uri, Zakonita more ča napravit po kući, baba i dida sritni i svi veseli ... život ponekad more bit tako jednostavan ... samo se to ritko događa.
Post je objavljen 16.02.2006. u 14:23 sati.