Uz zid istočne strane dinamovog stadiona curice i dečki đaci-prvaci. Svi svečano oblečeni. Plave hlačice i šoseki, bele košulice i na glavami pionirske kape s crvenim petokrakami. Mamice su si truda dale, da im dečica čim lepša buju.
Tu je i mali bracek. Stoji med dve curice i čeka. Su baš njega zbrali, da bi štefete nosil. Mu nekak čudno bilo, da kaj baš njega, al mu ipak drago pri srcu. Je to kak velka stvar drugu Titu štafetu nositi. A smo, kaj 1. a razred, prvi bili na redu vu tom lancu bežanja z štafeto. Od nikoga nismo primali, a dalje slali, kaj smo prvi bili. Je bracek mislil kak ta štafeta baš od tud ide i da bu on prvi je nosil i Tito bu na kraju to primil. Si je mislil, jel bu uopće mogel tih sto metrov je i preneti, kaj je to tak važno. Če nekaj pogreši, se popikne, il na krivo odnese; pa kaj bu Tito tam na kraju mislil. On tam valda čeka.
Su mu ju donesli, drvenu. Je imala kak neki poklopec gor i na njem dost velka crvena petokraka. Su mu pokazali kam treba bežati i komu je tam dati vu ruke. Se vidlo, da tam čekaju trojka, kak i mi, iz 1. b razreda, skor pri kraju zida stadiona. A je zid bil takaj poseben z crveni cigli napravlen. Na vrh je bil nekakvi beton z razbijani flaši, kaj bi se na nje zdrapal saki kaj bi štel skočiti prek, da bi tekme gledal. Sam si puno put razmišlal, kaki je to čovek bil, kaj je te razbijene flaše tu vu betona del. Nekak mi sad čist žal, kaj vu ta vremena ni aparatih bilo, da bi se to slikalo. Je i to del povesti Dinama. Da se ipak vrnem nama, kaj smo bežali. Nekak je braceku dugo trajalo dok ni bežanje počelo. Su se učitelice nekak više uzbežale oko nas, nek kaj smo mi na kraju trebali prebežati.
Sve je to za našu školu trebalo biti do škole vu Harambašićeve ulice. Tam su bežati trebali naši četrti razredi.
I sve je odjemput počelo. Su me malo čak i pogurnuli kaj bi znal da treba. Sam bežal da ni sam nis znal kak. Su mi oni iz 1. b zgrabili štafetu i počeli dalj bežati z njo. Su valda i njimi rekli kaj trebaju delati. Nekak je to bilo sve. Kolko razmišlanja, kolko važnosti, kolko rihtanja za tih sto metrof. I ostalo je tih sto metrof vu braceku. Je to bilo 52. leto.
Je puno let još prošlo kaj su štefete Titu nosili. Kasneje, kaj je televizija došla, sam gledal kak to zgledi i tam negde drugde. Deca, pa i starejši su nosili razne štafete, kaj sem ja tak zval ono kaj se nosi. Je svako leto bila čitava hrpa štafet, al je samo jena glavna bila. Sam si mislil kak to Tito stigne sve pročitati, kaj su vu njima razna pisma njemu napisana bila. Sam prije mislil kak je ta, kaj sam je nosil, jedina bila, a kasneje, da ju je bar pročital. Na kraju mi je nekak jasno bilo, da ju valda ni ni videl ni izvana, il morti samo u hrpi, kaj bi je negde stovarili. Bi mu tam neki radnik valda rekel: 'Drug Tito, ojte videti kaj smo vam dopelali. To je sve za vas.' Bi moj Titek onda zafrkal rukave i vu hrpu zašel, kaj bi videl, kaj to njemu deca pišeju. Ko zna, morti i je.
Su tak vremena prošla. Je i Tito prešel. Se sve nekak promenilo. Pripovedaju o tim vremenima čist drukće nek negda i to puno onih kaj su negda drukše govorili. Se to je valda vu redu, kaj su nekaj morti tek sad prokužili. Morti su i ............ Mene su vu tomu, kaj sam tu pisal, samo zlupane flaše na zidu dinamovog stadiona smetale. Nigdar nem razmel toga kaj je to napravil.
I kaj got ste negda, pa i sad mislili dragi moji prijateli Vas sve pozdravla i puno voli Vaš Mladen
Post je objavljen 18.10.2005. u 11:04 sati.