Zašto sitno? Zato jerbo je još usitnilo do Božića, a još se da nać koji lipi dan za prošetat. Je da je ovo na slici slikano PROŠLE nedilje, ali bilo je i ove nedilje skoro isto, samo zericu ladnije. Evo san se mislija ne javjat više ove godine, ali me je zasvrbilo ... baš me je krenija ovi ritam od svaka tri dana čako napisat. Baš lipo guštan ovi Božić. Prvi put sa mojon malon prinčipešon ... kapu na glavu, šjalpu oko vrata i ajde šetaj ... da mi nije nje uvatija bi još barenko desetak kili. Pa neka mi ko reče da dite ne priporodi čovika, kako kod okreneš! I još je jedan razlog zašto san stavija ovu sliku, na onoj prošloj su se niki pripoznali pa su me napali ... judi moji, ča se jidite, tovar je vridna i strpljiva beštija, i ako vas ko nazove tovaron, more bit da van je tija dat kompliment, a vi ga niste svatili. Zato da ne bude zabune, ovi put gre mrtva priroda. Je da vrime nije baš primjereno ovome dobu godine, ali, ča ću van ja kad kod nas nima magle da je moreš rizat nožen pa ujutro kad se digneš ne znaš je li svanilo pa se tribaš ustat oli te samo toka poć pišat pa da se opet vratiš u posteju ka naši dragi mišćani iz dijaspore u metropoli ča svratu ovod samo priko lita ... ovod ti se more samo dogodit da u nediju ujutro dojdeš kasno na rivu pa da ti dežurni penzići zauzmu sve šentade za sidit. Stojte mi dobro i nemojte se priždrit za blagdane!
Post je objavljen 20.12.2004. u 08:43 sati.