A kako cu ce drukčije osjećat vengo ka ovi na slici. Baš smo se svi naguštali ove dane šetnje po suncu, a posebno Vinka. Ko je ono spomenija raj na Zemlji? Je da je bilo malo zubato, ali ništa ča dobra jaketica i malo kape i šala ne bi moglo sredit, tako da bi Vinki virili samo nos i rumeni obraščići vanka. Neka šeta, jema vrimena za cilu zimu gnjijat po kući. Ionako već za ovi vikend zovu lipše vrime. Blagdani su blizu, osjeća se na svakome kantunu, ali mi je ništo utiho! Pri bi već odavno od početka dvanaestoga miseca rebunbavalo od detonacij, a sad: NIŠTA, MALO! Jema bit da nije gušt itat petarde okad se moredu NA BILO kupit u butigu. Prije je veći gušt bija kupi i bacat kad je bilo zabranjeno. Isto ka i Ustani Bane! Niko ga više ne piva sad kad se smi. Više nije evergrin. Neka našega Bana, nima veze ča je sad okrenija sablju doli put nas, namisto put Mađarske, ko nan je kriv kad se ne razumimo u Visoku Pulitiku. Zato smo mi njemu put gori okrenili Šipak. U Marmontovoj. Pa neka se Ban misli ča je pisac tija reč! Ako se ne čujemo/vidimo do Božića i Nove Godine, sritno i berićetno svima želi vaš Otac Četrdesetogodišnjak.
Post je objavljen 17.12.2004. u 10:34 sati.