Kad noga poskakuje na polku
|
Finila je još jena kastavska Bela nedeja. I ča reć? Zapravo, ja baš i nisan neki fan tih lokalnih feštah. Često san zno imet problema s mojima doma kad bin odbi poć na neku od njih ka je njima bila bitna jer je tradicionalna za našu fameju i daš će prit rodbina ku dugo nisan vidi. Ma zapravo, nisan ime zoč hodit tamo: ne volin onakovu muziku, ne plešen, ne poznon se te ljude... I tako je to bilo s mojin ignoriranjen većine feštah sa ta leta osim kad se nisan rivo izvuć i osim Rovinjske noći ka je va Istri pojam za feštu. Sve dok nisan otkri kastavsku Belu nedeju. Kako san ja ču, to je fešta od mladega vina. Održava se va staremu gradu Kastvu (mada ne samo tamo) prvega vikenda va deseten miseci i traje tri dni: subotu, nedeju i ponedejak (navodno da se i va petak nešto dešava, ali to ne znon za siguro). Ta fešta je nešto sasvim drugačje. Jako je vela, reka bin od oka da ima preko 30 štandi za popit pijaču, pojis kostanje, ćevape, janjetinu i ča god... Za ljude nanke otprilike ne bin zna koliko ih je va subotu moglo bit. Cirka par miljari. I to žensko, muško i srednje, staro, mlado i srednje, sih tipova i modeli. I si se veseliju, skaču, plešu, kantaju, piju, piju, piju...Nikakove šminke ni uštogljenosti, nikakove glume, nikakovih problemi, agresive, ničega slabega. Judi su stvarno sjajni. Imaju taj, za ovi kraj tipični, feštarski mentalitet i žive za stvori kao ča su Bela nedeja, marunade, maškare... I to se vidi kad pridete gori. Navodno je dan pole Bele nedeje, znači Beli ponedejak, radni dan va leti kad najmanje Kastavci poje na delo. Ne znoj je li istina, ma ni mi teško za verovat. Ovega leta smo draga i ja bili tamo sva tri dni. Subotu je bi totalni raspašoj i se krcato ljudi, nedeju je ljudi bilo manje ča meni paše pa mi je opet bilo joko dobro, a ponedijki su samo za najžilaviju ekipu i nekako mi se paro da su ljudi tad naživlji. Čak i ja, zakleti neprijatelj plesa, ulovi san som sebe por puti da mi noga poskakuje kad počne neka polka. Faken! :-)) Valja me je ambijent jednostavno preze. A po ambijentu se s Belu nedeju moru usporedit samo maškare i marunade. Maškare mi baš i ne pašu, ali marunade su pred nami! I ja, puno pozdrava Barbari kajsta voli Immanuela Kanta, a kad je bila mića, volila je i grupu Magazin. (za one ki nisu kapili) |
Komentari (8) - Isprintaj - #
