DAR IZ BILLE
Dico moja, puno van fala na dobrim zeljam za moj blok i uspjeh, ali ću ja i u buduće čitat i pisat i na Vašin blokin ako buden znala i razumila sve o čen se dela, a nute Vi i na mojen!
Ponosna san da san prva ženska kaj je oprila svoj blok u kem ću pisat o našemu malemu gradu, zame je to jako važno!
Ma jedva san se smirila oko našega radija i tih svakovih komenti, pogotovo kaj špotaju Nešu i gospu Dubravku, (pa kaj ne moru lipo reč nego grubo kaj divlji ljudi, bože mi prosti….) kad danas novo ludilo i stresi, ma ću van sad sve ispričat.
Našla san u kaslu od pošte reklame za Konzum, Billu, Lidel, i sad san si mislila da se svi u dogovoru organiziramo pojt po ti naše centri, zač svi nudu narodu kaj da su na cesti našli, pa kako se to ni moglo dogovorit san ja odredila da Mije gre u Konzum i da prati i dežura da bude broj 100, a Mare i ja ćemo pojt u Billu, zač Mare ne voli pojt sama nikad ni u grad, takova je stišnjena i srameća, pa ajde ćemo nas dvi u tu novu Billu.
Mije je krenil u pol jedanast za Konzum, i spisak je zel, zač on bi natrpal pive i vina i konjaka i onda mu to morda nebi ni priznali, znaju oni ki bi iskorištaval, a mi ćemo samo tako nešto sitno i da vidimo med narodom kaj ima i kakve su cene.
Moja je snaha došla po nas oko 12 ur kad je ludilo jenjalo i kad se to malo razredilo, (jer velu da je bilo tako puno naroda da se po stanici parkiralo), pa ću zet i nučicu sobom, a snaha će pojt južinu za sina i dicu finit i dojt će za uru i pol po nas.
I tako smo mi došle, tamo je sve lipo složeno, zelenjava lipo složena, sve kaj postoji na policam, friško meso, suho meso, rezanci, papri, pekmezi, kiseline praški, ma ne moran van nabrajt, ali ni van meni bilo do puno kupovine van morda zet brašno za štrudl,(i bome dobro da san Mijeti napisala cedulju zač je sve bilo skuplje, a to valjda jer je dučan lipši i u gradu, zač bi drugo, sve je to isto) i nučici kaj si izbere.
Ni moja Mare ni bila baš nešto zemala, neg moja nučica bi oni Nesquick (valja san dobro prepisala) u onoj žutoj škatuli, pa zet ću ditetu kad voli, i sve dobro do blagajne, idemo mi to platit, da i kruh san zela, jer nisan stigla misit, kad mala moja nučica dobije igračku uza taj Nesquick i to lipo ću van reč KOSTUR, mali lipi kosturak od čovika!
Ajme, kad je digla rukice prema meni sa tim kosturon, a ja se nasmišila, a kad san vidla to u rukican njezinin, ja san mislila da će me šlagirat, noge mi se oduzele, zela dite i pobigla van, da mi se mozak trun razladi…
Tako smo nas dvi vani stale, ja san gurnila kostur u onu vreću njivu i odma san ga bacila u sporet kad san prag prekoračila od svoje kuće.
Kašnje je došla Mare i donesla za manom one rožice, i veli ajde ih i ti zami tamo, ma nisan tila, neg si ih posadu da ne rečen kamo, kad su dici išli kosture davat uz ono kaj dica volu jist'?
Ne zvala se ja Janjo ako još krenen s diteton u koji trgovački centar na ovem celem svitu!
I ni to sve, Mije je došal u 6 ur popodne, ni mogal dočekat stoteg broja, zač mu je prvi prošal pa je čekal drugi, i rekal da ga je bilo sram više postavat i potrošil 389,16 kun, tulko ga gromi opalilo i mene i njega i više nikad neću slušat reklame i čitat jih.
Tako je lipo meni dan prošal u muki i trošku, težak i čemeran, a najviše mi bilo žal kaj su mojoj lipoj i pametnoj nučici, mojem anđelu u ruke deli kostur.
I Mije i Mare i snaha i sin, svi mislu kako i ja mislin o tem činu, a ja mislin i dalje jel se to samo meni tako dogodilo i mojem ditetu ili je još dice uz taj nesretni Nesquick dobilo kusturak od čovika ?
Eto, mislila san da ću vas s čin nasmijat i razveselit, ma ispalo je drukčije, ne more se sve grdo u lipo pretvorit i u smih, valjda ću to zaboravit i nešto van lipše drugi put pisat.
Došla su čudna vrimena i još čudniji običaji, ako um imaju moru znat da kosturi ne moru bit igračke za dicu.
Ajte bok
Janjo, 21.veljače 2008.
