Ane se uvatila generalke, kako u glavi tako i u svon životnon ćumezu! Pobacala san toliko stvari da susidi valjda misle kako san koga zaklala i, onako fino, izrickala na komadiće pa sad dajen mačkama jist (uala, ča san greza!). Našla san čak i neka pisamca iz osnovne (Šta to radi u Zagrebu, zapitala se Ane). Većina tih sentimentalija je dočekala zoru u obližnjen kontejneru, al' neke stvari nisan mogla itnit. Je smo i mi judi blentavi, vežemo se za obične papirušine! Al' žensko san pa će mi svit oprostit.

Sve u svemu, ne šljivin vas još par dani jerbo iden malo u đir s rođon. On van je jedan mladi i zgođušan dečkić i možda se i ja zeru pomladin u njegovon društvu. Barenko ću se prisitit ča je mene mučilo prije ohoho godin.

A i dragi mi je pribotuna kako iman ozbiljnih problema s internetskin sviton (bolje reć – iman problema s pravin sviton!) jerbo po cile dane samo čitan blogove. E! A ima bit da jema prav jerbo san se neki dan uvatila kako mi se ruka trese kad san pošla kliknit disconnect. E!

Tako da vas škivajen bar dan-dva... Da vidin 'oću li ja to moć.

Ajmo svi: Aneeeeee! Aneeeeeeee!


E, i da van ne zaboravin reć. U blogovskon svitu se pojavila još jedna Ane ma se ona potpisuje s velikin A, a ne ka ja, nepismena (joj, da me profešuri vididu!); tribalo bi me vratit u prvi razred osnovne! Stoga, nemojte mislit da žena stoji iza svakojakih pizdarija u komentarima. To san ipak ja. (A ovakva izjava je dokaz dokud seže moja skromnost!)

;-)