Kaže se - živi ka pas - pasjega li života...ne znan ča oće otim reć...
Ma ča pasiman fali zagospu...jedini in problem oćelidu izist spizu suvu iz škatule oli mokru iz konzerve...oli će se ofendit i na to pa da in gospodar kuva vazda friški obid strogo nutricionistički odmiren i izbalansiran...za sjajniju dlaku sridon gre jedna spiza... za jače kosti petkon druga... za kondiciju ponideljkon treća... za kurbanje suboton četvrta... za pizdumaterinu peta, šesta...
Ako je kojemen pasu do mode, samo će počet nezaustavjivo cvilit, utiho zavijat, taman toliko da ostavi dojam fino odgojenog pasa spram susida, a gospodaru da digne tlak. Kad usto mrdne desnin uvom, to je gospodaru sinjal da ga mora pod hitno vodit u frizera...nareslo mu pinku okolo vrata...repica je zadužena za dić uzbinu za novu monduru... a bome, normalno da neće nosit onu od prošle sezone, ni zadnja štraca koja ne drži do sebe.
Pasu se zna njegovo misto u kuću...ne daj ti bože da bi gost sija na kauč di on momentalno ne stoluje...ne triba pas o temu vodit brigu, a jok... čin gost dođe gujicon poviše tega pristolja, zavapi gospodar - ajme, skužajte, to je misto našeg Kikija, znate alergičan je puno na sve živo u kući, samo na ovi baršun ni, bidan naš Kiki...ča će gost nego dizat onu gujicu iz spušćajuće poze i pripomistit se na izgriženi taburej (tu Kiki liči neurozu kad na tv-eju pobide tega dana Pedigre reklame za maške).
Dabome, fizička rekreacija više puta dnevno...strogo elitni park sa puno slatke dičice...gospodar triba od opreme imat škovaceru, pas pamučni triko i traku okolo čela... kad se vratidu doma, oma tuširanje sa 80 litara...posli feniranje i češljanje...fjube u raznin kolurima ...
Ma ima tega još more od čega san jubomorna ka pas...
Joj da san barenko pas...
|
