Dosta je bilo burno, deboto i naporno, ove godine u našin maškaran (Mašogradskima, da ne bude zabune!) ... tribalo je dostojno obilužit dvadesetu obljetnicu okad je nekolicini “luđaci” dviiljadite godine palo napamet da bi se mogle obnovit maškare u naše malo misto. Da nastavimo svitlu tradiciju naši prethodnika koji su od tega učinili instituciju kad su “Krnjevalske svečanosti” trajale cilu šetemanu (tjedan, za sjevernjake) ... nije bilo lako ispočetka, bilo je uspona i padova, ali nan niko nije predviđa da ćemo uvatit dvadeset godin!!!
Dunkve, kad me je Pricidnik Marin u subotu ujutro zva da povirin kod krajice Majde & barjaktara Bare Kengija, u njiov dvorac.... nisan se puno mislija. Taman san uspija napravit sve ono ča san namirija u subotu ujutro, prominija san kopita mojoj “Kobili Suzi” u Živkovoj štali kod pumpe na magistrali ... pa laganim kasom odjaha do Mašograda ...
Naravno da mi nije bilo problem nać dvorac od Banovi, pa moga bi se itnit stinon od moje kuće do njiove  ... a ne mogu da ne spomenen, mi smo se, ka sućuraške maškare, zadržali na teritoriju svoga mista, a ne neki ča su i autoputen morali potegnit do mista di in je bila fešta. Eto tako!
Kad san doša, nije mi “Oni ča bode perunon” da mira, pa san malo povirija okolo ... svega se tot dalo nać ... od stare arhive o’ maškar ...
... priko famozne “Rokove gitare” koja, jema bit, nije zapela na Carini, nego kod Bare
... a ovo mi ni sam Kengi nije zna objasnit odakle su, jerbo mu se nijedan od predaka nije zva Janez
Cilo to vrime je naš Marin vridno mažinava oko gradel ...
... i punija teće sa ukusnin delicijan ...
Tribalo je priranit sve ove gladne maškare, ča su nadirale u valovima ka u “Pearl Harbouru”. Srića da nismo svi došli u isto vrime, jerbo bi tribalo opet šator iznajmit ... a ovako nije uopće bila gužva.
Dapače, skoro pa obiteljska atmosfera ...
Kad već govorimo o obiteljskoj atmosferi ... bilo nas je od oni ča još šetaju na “sve četiri” ...
Priko oni malo iskusniji cura ...
Photo: Anamarija Jerčić
... pa sve do oni koji se dikod, ali samo dikod, malo naslonidu na ščulu (štaka, za sjevernjake) ...
Kako je u javnost procurila informacija da je ovo priprema za izbornu skupštinu koja bi se tribala skoro održat, neki su, makar spriječeni u dolasku, spremno priko komunikacijski kanali istaknuli kandidaturu za urednika “Mašogadura” ...
A ča ću van poć govorit kako je bilo ... spiza odlična, a kako nije bilo bezalkoholnih pića, i ja san se mora mašit makar za gemišt ...
... pa je i to bija jedan od razloga zašto san ranije napustija mjesto radnje. Dok san još moga sam doć do doma ... srića da je Stipe Pare iša u pensiju 
Kažu mi oni ča su ostali, i ča se još svega sićaju, da je bilo do duboko u noć ... i neka nas!
Ne vidin razloga da in ne bi povirova, pogotovo kad san dobija ovi videjo ....
Neka bude još puno ovakovi fešti ... Zdravi i veseli bili!!! 
|
