Godinama već ove scene zamišljan samo u svojoj mašti ... još od 2001. kad mi je pokojni stric Mirko ovi bokunić (komadić, za sjevernjake) zemje prepisa, tako da san ovo donija u dotu (miraz, za sjevernjake) kad san se oženija.
I ta zemlja jema svoju priču ... ovo je ustvari didovina, od pokojnoga dida ... ali kako u ona doba nisi moga primat dičji doplatak ako si jema zemlju na sebi, to su otac i strici/tete sve zemje pripisali na strica Mirka. Pa san ja, kad san ovo dobija od strica Mirka, mora platit porez da bi pripisa zemju na sebe ... o tempora, o mores!
Priskočimo koji desetak godin u budućnost ... Zakonita i ja smo postanari, rodila se mala prinčipessa Vinka, počeli smo razmišljat o "kućenju" ... komad ženine obećane zemje na Bile (kod hotela Resnik) nismo mogli ni prodat ni darovat dokle se ne razmrsi ogromni grop nacionalizacije/denacionalizacije/parcelacije/whatever ... puno duža i kompliciranija priča nego o mome komadu zemje, pa ćemo to ostavit za drugi put.
A kad buden pisa knjigu "Kako zgradit kuću i ostat normalan" to će bit posebno poglavljem obećajen!
Dunkve, di smo ono stali ... počeli smo razmišljat, je li ... o vlastitoj "štalici" 
Kako drugovačije nego na kredit ... Zakonita radi u "Bobisa", sudužništvo, njezina plaća bi išla na ratu ... sutra triban to podapisat ... a danas uitilo nekadašnjega intendanta splitskoga HNK Sanadera ... zapuvalo je "malo vitra" i napokon je i najvećin optimistima došlo iz guzice u glavu da smo u veeeeeelikin govnima  ... ča je puno konkretniji izraz koji puno bolje opisuje situaciju nego ona benigna besida "kriza" ... ferma san kredit ... priselili smo se u Zapadna Kaštila.
Vrime je pokazalo da smo itekako bili u pravu ... "Bobis" je lagano prnija u potič (počeja otpuštat, za sjevernjake) ... Zakonita je ostala bez posla i da san bija u kreditu sad bi bija ili u prežunu (Lepoglava, za sjevernjake) ili u "Gospe na Hladi" ... i ča smo drugo mogli nego sidit i čekat.
Da malo ubrzan događaje ... situacija sa ženinon zemljon se razmrsila, mogli smo je napokon oglasit za prodaju. I kad san već izgubija svaku nadu, već san počeja govorit susidima na mojoj zemlji da ću je prodavat ... ukazala se prilika, "oženili" smo parcelu na Bile i krenili u izradu projektne dokumentacije ...
Pošto radin tamo di radin, je li, u "beloj zgradi" (gradska uprava, za sjevernjake) mislija san da će to sve bit gotovo u roku "keks". Kako san se ljuto privarija 
Ali neću sad o tome, mirita (zaslužuje, za sjevernjake) i to jedno posebno poglavlje u već spomeutome najavljenome libru!
I nemojte mislit da se zajebajen, glede knjige ... sve ča mi padne napamet, zapisujen ... za slučaj da me počme posjećivat oni Austrijanac ča sakrije stvari po kući ... samo pomalo! Sve u svoje vrime
Još jedno poglavlje knjige zaslužuje i traženje ponuda od građevinaca ... doduše ne toliko ka prije spomenuta dva, ali onoliku količinu skuži (opravdanja, za sjevernjake) nisan čuja još od škole, i to niži razredi! E umrla baba, e javiću ti se sutra, e operira žuč. A sve san razgovara sa ljudime po nekoj preporuci, nisan vrtija brojeve iz oglasnika!
Zar je tako teško reč NE MOGU/NEĆU/GONI SE I TI I TVOJA KUĆA JEMAN POSLA/whatever?!?!?!
Napokon, nakon svih savladanih prepreka ... počinjen! Tribalo je najprin očistit zemlju ... potaracat prašumu koja je nikla, nikad čišćena, tamo ...
... pa onda to skupit na jarpe (hrpe, za sjevernjake) i pokupit zeleni otpad (bilo je tri kamiona materijala!)
... i napokon, bageron malo poravnat zemlju ... da po nedilji more doć đometar (geometar, za sjevernjake) udrit oznake, da se more kopat za temelje i dalje kako Bog zapovida ...
Photo: Neno Sokol
I tako, ako bude sve kako triba ... u ova doba dogodine ... ovod bi tribala bit mala skromna prizemnica, sa ravnon prohodnon taracon ... građevina koja će ovako izgledat sa sve četiri strane svita ...
istok ...
jug ...
sjever ...
zapad...
Nadan se da će ovo uspješno bit privedeno kraju ... i naravno da ću svaki novi događaj, novi pomak naprid i gotovu fazu gradnje uredno dokumentirat ovod 
Da mi je bar mome ocu i ocu od Zakonite i stricu Mirku ustat pa ovo vidit!!!!
Zdravi i veseli bili!!! 
|
