Dogodine je, ako se ne varan, jubilarno dvadeseto izdanje obnovljeni maškar sa kojima smo se počeli, da prostite, za'ebavat sad već daleke dviiljadite godine ... odma slideće godine je izaša prvi broj "Mašogadura".
Debul (mršav, za sjevernjake) na osan stranic umnožen na fotokopirnu makinju ... kakovi je bija i dogodine. Jer san, da prostite, skoro sve mora sam potizat, vatat ko će pisat, pa je i dogodine je izaša u sličnome formatu, samo par listov više.
Dviijadeitreće, na onu godinu kad san potpisa Zakonitoj ono "i u dobru i u zlu" već je bija skroz ozbiljan. Iznutra još uvik crno-bili, ali sad već štampan u štampariji, a korice su već bile u bojan ...
Malo-pomalo smo resli i u kvaliteti i u broju stranic. Kako smo uvik išli ukorak sa vrimenon, niko smo vrime mećali sa "Mašogaduron" i video-snimku maškarane povorke od godine prije ... Sićan se dobro kad me je pokojni Meho napa da koji je ono CD, kad ga je uvalija u liniju čulo se samo "ššššššš" ... pokoj mu duši. Bija nan je nepresušno vrelo inspiracije i izvor materijala, a najskoli kad je dobija svoju rubriku "OZNA sve dozna" ... Po Mašograda je drćalo o straja da ga se Meho ne siti, a ona druga polovica se unaprid naslađivala 
Moga bi sad još dva dana pisat ča se sve događalo u i okolo samoga "Mašogadura" ... Kad san jedne godine kuka kako mi fali materijala, pa mi je pricidnik Želko, i njemu pokoj duši ... donija duplericu o "Playboya". Ne radi slike, šporkaćuni jedni, vengo zato ča su uvik na kontra strani duplerice bili vicevi. Ajde, bar je pokuša doprinit, a ne ka gomila dežurni mudrijaši ča su samo znali bacat kritike a da su i donili ča materijala, mislin da bi učinila dobra nevera 
Opet ja odluta ... jbg, takovi mi je horoskop 
Reka san već da smo uvik išli ukorak sa vrimenon. Govorin za sebe, naravno, jer pojedini iz maškar još ne znadu ugasit kompjuter, atroke upalit ga i poslat email 
Čin je propusnost interneta dopustila, čin smo osjetili prve blagodati širokopojasne internetske veze, "Mašogadur" je u PDF varijanti počeja putovat sviton ... a lani, da ne rečen priklani, smo tu priču malo i proširili ...
Makar po Europi, jerbo bi nas impoštavanje po cilomen svitu bacilo na inkanat, oliti pjesnički rečeno, izila bi slama tovara
Destinacije su ostale slične, s tin da je Miki svoj primjerak vazeja osobno, jerbo je bija ovod kad su bile maškare ... a Vlatki san njezin primjerak uručija osobno, kad smo Vinkica i ja bili gledat "Murterske Bake", njiov krnjeval u Murteru ... brrrrr, duša mi se smrzne kad se samo sitin onega leda ....
Đuro, koji je oš-neš malo i kriv za ovu điradu Mašogadura, dobija je svoj primjerak, ma mu se, jema bit nije dalo izalazit vanka slikavat na ovi led pa je malo zaglumija okolo svoga kantunića Mašograda u Šveskoj ...
... ma se zato Aljoša nije pripa izać na ono "bilo govno". Ionako je reka da je u nji vrime ka da je proliće ... skoro su bili u plusu sa temperaturon
Ove godine su svi bili malo više "kućni tipovi", kako Božo u Hamburgu ...
... tako i dotur Antonio u Grazu ...
... dok je Mikiju u Italiji ipak bilo bar uncu teplije ...
Duje po Zagrebu se još, jema bit, oporavlja od Sibirske ciklone pa se ni njemu nije dalo vanka izalazit ... ali ovi put jema i odličnu skužu (ispriku, za sjevernjake) ... prinovu, pa je i zato mora više u kući stat, da se dite, je li, ne razboli
Ove godine san malo više slikava one ča su uzeli Mašogadur u povorci ...
... pročelnica Sandra i gradonačelnik Denis ...
... Tonči & Jure ...
... Glamac jr. ...
... Suzana ...
... a vridilo je obać i našega dugogodišnjega medijskoga pokrovitelja, našu Paolu na svome radnome mistu.
A ča će bit dogodine? Moramo smislit čagod novega, ipak se radi u dvadesetoj godišnjici okad san i ja ima svoj daleko najupečatljiviji nastup u povorci sa slikon "jeman osjećaj da nas nikor sluša" ...
... dviiljadite godine u našin prvin demokratskin obnovljenin maškaran u Mašogradu.
Zdravi i veseli bili!!! 
|
