He, tot san vas čeka! Nije ovo prehrambeno-nutricionistički tekst, čiji je naslov napisan dva puta, jedan put normalno, a drugi put po trogirsku, bez kvacic!
Oto van je već četvrta, deboto kako bi rekli tradicionalna manifestacija u kojoj se spaja naoko nespojivo: sva moguća spiza koja se sa ŠALŠON (umak od rajčica, za sjevernjake) more mutit, i SALSA, ples južnoameričke provenijencije.
Nikako da ja sa ton maanifestacijon izajden na zelenu granu. Lani san jema itekako opravdan razlog za kašnjenje, dunkve, u isto mi je vrime bila promocija mojega libra, a 3. SALSA & ŠALŠA samo po ure kasnije, pa mi je ekipa sa moje promocije doslovno sprintala doli u Zapadna Kaštila, a sa organizatorima doli su dogovorili da in nastup stavi ča kasnije. Kako san ja mora na promociji vlastitoga libra ostat do kraja, dokle ne pokupidu razglas, katrige i ostalo, kad san dospija do Igrišća, nidir oko ponoća, već su žuti mravi ogratali i dezinficirali sve teče u kojima je bila spiza, a plesne grupe su već točavale umorne noge doma u kajinu (lavoru, za sjevernjake). Još lani san čvrsto odlučija da ću ovogodišnju manifestaciju odgledat i, zašto ne, degustirat od korica do korica.
Ali ajme; sinoćnja nevera me je zatekla u „Emezete“ odakle po ure nisan moga njanci do aute izać. Lipoga li imena za neveru: Pomet!? ... biće se pokojni Šunje vrti u grebu ka ventilator  ... „Šalša“ je odgođena za nedilju, to ka danas. A danas san mora Vinkicu odvest u Mašograd na jedan rođendan. Ajde neka ... računan ja da ćemo se uputit malo ranije, ali računala je i Fata u onome vicu 
Jedva san Vinkicu i Zakonitu odlipija od stola u deset uri. Tako da san dospija na Igrišće deboto u fotofinišu. Ipak, dovoljno rano da slikan moje sućuraške Šalšone, ili kako se već sad zovedu, bolje da ovako napišen, najmanje san falija ...
... koje su otplesale svoje, vođene vridnon rukon Marijane Vulas ... i bodreni zdušnin navijanjen donjokaštelanske navijačke skupine pdo vodstvon Dr. Housa ...
Skoro san se tija uputit doma, kad čujen priko uva di Željka Perdić sa pozornice čita ko je dobija nagrade za najbolja jela učinjena sa šalšon i čujen di je pročitala KPU „Kampanel“, moje mašogradske maškare. Taman san is stiga meknit u kvadar sa onon velikon vrljačon (kuhačon, za sjevernjake) koja će dobro doč Mariji i ostaloj ekipi za kuvanje na idućin feštan i naravno, za mišat šalšu i dogodine.
Sad san se moga na miru uputi u sleep mode, jerbo ujutro triba poć na posal 
Zdravi i veseli bili! 
|
