Još od dočeka Nove 2014. u Prugovu rekli smo našoj domaćici @juliere da bi rado došli povirit ovde kad bude fešta svetoga Ante. Bija san na to skoro i zaboravija, ali me je Julija nekidan podsjetila, napominjuć da bi mogli i ubrat malo trišanj. Kad san Vinkici reka da su trišnje u pitanju, mora san je vezat debelon cimon (brodskin konopon, za sjevernjake) da ne odleti u zrak od sriće. Nikako nismo mogli iskombinirat da bude i Zakonita sa nama. Bogu fala, još radi, fala na pitanju 
Dan je počeja sa prolaznon naoblakon i povremenon grmljavinon ... naši „vatreni“ su odigrali otvaranje svjetskoga prvenstva u balunu sa domaćinon, Brazilon. Kud ćeš bolje prilike za promociju i igrači i Lipe Naše, gledalo nas je DVI MILIJARDE svita, igramo sa onima ča in je balun važniji od svega ... a na kraju je deboto ispalo OVO:
Jer smo, ka i puno puti do sad, vidili da nas uvik drugi cijene više nego mi sami sebe, i uvik dižemo u zvizde i onoga koga triba i koga ne triba. A na kraju balade uvik svoju ulogu odigra neki seronja koji na kraju filma umire od štucavice koliko ga svi spominjemo 
Pribolili smo i to, tek je prva utakmica, ej! Triba navijat i dalje, dokle god ima nade da se plasiramo dalje. A pogotovo kad su dica u pitanju, i kad je zadnji dan škole:
3.a OŠ Kneza Mislava u Mašogradu
Vinkica, Ema i Manuela, ka članice plesne grupe koju vodi teta Marijana Vulas, dodale su i malo začina proslavi kraja škole sa svojon dobro uvježbanon plesnon točkon
Nakon ča smo pokupili Vikninu prijateljicu Danči, malo smo odmorili i krenili put Prugova. Ka ča je i red, najpri smo bili povirit na misu, taman je bija blagoslov dice ...
... di smo, naravno, našli i našu domaćicu, Juliju i njezinu Sunčicu ...
Grijota bi bila ne obać malo ponudu i potražnju na fešti, kad smo već potegli do gori ...
Možda ove sličice i sam asortiman na njima djeluju arhaično, ali triba ovoj današnjoj dičici mobitel-generacije objasnit da se vrtal ne kopa sa klikanjen miša, ili potizanjen masnoga prsta po ekranu 
Kad smo obavili kod crkve sve ča smo tribali, išli smo malo povirit do kuće naših domaćina, di su i Vinkica i Danči sa gušton brali trišnje sa par stabala isprid kuće. To me je sitilo na još jednu staru Vinkinu sliku, pa san učinija još jedan prigodni remake
Jedva san nji dvi odlipija kad je tribalo poć doma, a tribalo je još i Zakonitu pokupit sa posla. Fala lipa teta @juliere na ugodnome popodnevu! Vidimo se uskoro opet, nadan se i sa Zakoniton u sastavu.
Taman san doma prispija pogledat kraj drugoga poluvrimena reprize finala za prošloga prvenstva svita. Bidni Španjolci, deboto da mi ih je i žaj bilo, a da nije Robben škrt ka ča je, moglo je bit deset i jedan.
Zdravi i veseli bili! 
|
