... da ne zamirite, i ja san, davno, obaša cilu županiju, i šire, sa mlaznicon u ruci i brentačon na kostima, ma koliko mi šutjeli o tome ...
E, i zaboravija san napisat, član sam DVD "Mladost" čin san uspija nagovorit mater da mi se potpiše na pristupnicu, od 1977. godine.
Ne mogu, ubijte me, ne mogu se ne sitit maškar u ova doba godine. Ako slučajno i zaboravin, badne me Zakonita pa ka ono da neče napomene godišnjicu. A i godišnjica mi je usko vezana za maškare. Dunkve, 1.3. 2003. godine Gospodnje, kad san potpisa ono ča san potpisa, i kad san reka „oću“ ... bile su u Mašogradu maškare. I tribalo je bit sve izmišano, da se nije dogodilo ča se nije tribalo dogodit, umra mi je ženi ujac u subotu ujutro i dobro je ičega i bilo. I dan danas mi nosidu pod nos mater i Zlato Mamino da san zamalo okasnija oženit se jerbo san iša slikavat maškare.
Bilo je puno toga sve ove godine, i smija i plača, i usponi i padov ... i života i smrti ... nažalost, ča nas je i dotuklo ove godine pa ćemo malo pauzirat sa krnjevalskin događanjima i gostovanjima ...
Ma svejedno, uz dužno štovanje svi razloga za pauziranje, ni kriv ni dužan, doša san u napast ... kako mi je bila riknila jedna makinja sa arhivon, onda mi je sve prošlo kroz ruke kad san spašava ča se da spasit, pa su mi tako došle pod ruku i slike povorke i iz Mašogadura od ovi pusti godin ... zasvrbilo me je, moran priznat
Jednu godinu san, skupa sa mojin kumon @pečinon, iša ča iz maškar. 'beš ti posal di se niko nikad nije pokara (posvađa, za sjevernjake) ... onda san uteka u Rijeku na dičji krnjeval sa Vinkon samo da ne dođen u napast ča napravit ovod ... ali ne mogu. To je bilo jače od mene i sad učinen ča mogu, karan se i smijen skupa sa ostalon ekipon. I plačen ... nažalost, u zanje vrime puno više nego ča bi to bilo ko od nas tija ...
Zato san složija ovi mali slide-show, koji nima nikakove pretenzije da sveobuhvatno prikaže cile cilcate mašogradske maškare u desetak godin (da ne rečen TRINAJST) okad i prakticiramo u obnovljenome sastavu ... dogodine, ili za misec dan, bi siguro odabra koje druge slike ... ali eto, kome sve svidi, biće mi drago, a kome ne, a ča ću mu ja ;)
