Ma koji đir po rivi ... lipo nas je vrime napokon istiralo vanka ... sunce je napokon pristalo kašljucat, i zabušavat, pa se sad lipo šepuri svon snagon ... more se komodni i kratki rukav obuć, a ne mora se pa zit sa robon, ni za sebe, ni za kućne ljubimce, kako je Vinka vridno zabilužila svojin fotoaparaton nikidan u Trogiru ...
... ovega malega čovikova najbojega prijateja, kojemu su, jema bit, baterije pri kraju, pa mu je gazdarica obukla đemperić, da se mali ne smrzne ...
Na stranu šala, ovo je već ozbiljna stvar, potla priboljene prilade i odrađene ture antibiotika, svečano smo proglasili otvorenu sezonu sa prvin sladoledon ...
... uredno zabiluženin nikidan na spliskoj rivi ... isprid Bobisa ... di smo bili vidit jesu li tehnobetonske kockice još na mistu. Jesu, jesu, i ovo sunca je sve izmamilo vanka ... doduše, još se nosi napolak zimska garderoba, jer se još nije stigla nabavit lakša roba, a Bože sačuvaj da fina šinjorina obuče koji lanjski komad robe, pa da joj se svi smijedu. Nima veze ča doma izi za obid dva lista salate, i ča jon se želudac zalipija za kičmu, ne radi dijete nego radi neimaštine, triba se poć pokazat na Rivu, e!
Ali neka, molajmo mi s miron ote ča mislidu da in je zlatna ... bilo je ovod još zanimljivi stvari za vidit ... ka i ovi aviončić ča pari ka da komarac leti priko kampanela o Svetoga Duje ...
... ili ovo, od nikidan, kad je ujutro more bilo, kako mi rečemo, „ka uje“, pa san mora, pri vengo odveden Vinku u vrtlič, zamrznit u fotografiju ovi prekrasni kadar. I pokazat je vama, dragi moji štioci (čitatelji, za sjevernjake)
Nisan ni Lupino, ni Mihanović, a ni Ante Tomić, ali ovakvu sliku mi je uvik drago vidit. I napisat koju besidu ... Jesan li možda malo  ... a vjerojatno jesan, ali mi je sad kasno da se minjan. 
Pogotovo kad se bliži finale ... i kad moje dvi najdraže ženskice na svitu ... posli puno, puno, vrimena, gredu malo prošetat vanka, po lipome vrimenu ...
E, sad stvarno mogu reč da nas je istiralo vanka. Gremo još pozapodne i crtani film u kino pogledat, i nadat se da će i ova dva dana praznika bit lipo vrime, da ga zajedno i kvalitetno provedemo ... Zdravi mi i veseli bili! 
P.S. I skoro da san zaboravija, svima ljudiman dobre volje, koji štuju sutrašnji blagdan ...
... želin, od svega srca,
SRITAN I BLAGOSLOVLJEN USKRS!
|
