Eto, završilo je i ovo državno natjecanje vatrogasaca, ovi put na domaćemu terenu, jerbo je Poljud, recimo, za sve nas iz okolice itekako domaći teren.
A zašto to napominjen? Pa zato jer se državna natjecanja vatrogasaca na Poljudu održavaju skoro po ritmu cvjetanja agava, jerbo je zadnje bilo 1983. još u ONOJ državi.
Ko zna zašto je tame tako, nedokučivi su puti Gospodnji, biće i jema istine u tome da ne moredu vatrogasna natjecanja organizirat oni čiji je grad osnova (Dioklecijan) oni ča je da užgat sv. Florijana, zaštitnika pumpjeri.
Ko je ono spomenija Vatrogasnu Olimpijadu?
Ala, ala, partija san daleko, puno dalje od stoljeća sedmoga  ... vratimo se mi bitnome.
A bitno je da se, grubome vrimenu za dišpet, održalo natjecanje za starije kategorije (Muški A i B, Žene A i B, Profi A i B) koje je bilo izlučno za vatrogasnu olimpijadu u Ostravi.
Semafor se ovi vikend malo odmorija od oni ča trčedu za mijuron ...
... a travu su zauzeli oni ča su spajali i rastizali cjevi, probajuć pri tome bit ča brži i da na zašlajfaju po mokroj, dobro natopljenoj travi. Reka bi Edo Pezzi, teren nije baš bija idealan za igru ...
... a po tartan stazi se trčala štafeta, ovi put bez sprava. Nije kiši za virovat, ako padeš na travi moreš se samo išporkat, a ovod ako bi pa sa grede ili koje druge sprave, jema bi i doktor Čukelj posla ...
... neki su iskoristili jedinstvenu priliku pa zaseli u svečanu ložu, promatrajuć sve lagano sa visoka ...
... a na kraju je ipak zasjalo sunce. Svima, i zapravo, a ne samo figurativno. Bilo je i malo grintanja, fala Bogu, na suce, ali ni blizu kako zna bit u ovakvin prilikan.
Evo ko se plasira na Olimpijaduu Ostravi (Češka, 2009. g.), po kategorijan:
Muški "A":
1. DVD Paukovec
2. DVD Deanovec
3. DVD Lekenik
4. DVD "Spačva" Vinkovci
Muški "B"
1. DVD "Mladost" Kaštel Sućurac
2. DVD Lipovljani
3. DVD Donja Gračenica
4. DVD MTČ Čakovec
Ženske "A"
1. DVD Breški Jalševec
2. DVD "Mladost" Kaštel Sućurac
Ženske "B"
1. DVD Biškupec
JVP-A
1. Čazma
JVP-B
1 Čakovec
A ako koga zanimadu detaljniji rezultati, more i nać na Vatrogasnome portalu. Eto, opet me je dopa post u nedilju, ali bolje i to nego nikako, je li  ?
Doma san, radin, ovo je ka mali odmor, za napisat post  , a Vinka je u Kaštila, vjerojatno nešto muma kod babe Vinke ...
arhivska snimka
... a kad sveć spominjemo bakice, i ova sučuraška je doma, bila je dobra i poslušna pa je molalo je bolnice par dan ranije.
arhivska snimka
Baba Slobodna je dobro i dobro se osjeća, a ča mislite kaako to znan? Pa lipo, tipičnareakcija, počela mi je ronzat da kako san moga onu sliku stavit iz bolnice, kad jon je bila neuredna kosa. Eto, ispravljan grešku, ovo jon je najlipša frizura od svi slik ča san jema u arhivi. Eto, pa ko jon je reka za onu sliku neka jon reče i za ovu, jer sama nije jemala di vidit.  
Zdravi i veseli bili ... 
P.S. Nisan moga izdržat do sutra za izvagat se, pa san to obavija ranije, jutros. Koliko san jema prije, neman pojma, jerbo bi vaga izbacila “Err” kad bi sta na nju, znači da san jema DEBELO priko 150, a današnje vaganje je pokazalo 147,0. Epur si muove, da mi oprostite na latinskome, mora san citirat Galilea, ča oće reč:
Ipak se kreće!
Gremo naprid! Od sutra se pojačavaju fizičke aktivnosti!  
|
