Ne znan di san ono pročita, ali je živa istina, da je najlipši dan u godini subota prid izbore, kad je izborna šutnja ... posli onega bombardiranja sa medon, mlikon i boljin životon, kad te više nije straj otvorit samo već davno opivanu paštetu, vengo i dignit dasku sa WC-a, da ne bi koja izborna pantagana izletila sa nekin novin izbornin pokličen 
Ajme, koje blago za napaćene uši ...
I nije bija nešto posebno lip dan, ali bitno je da ne pada kiša ... ionako san već odavno Vinki obeća da ću je odvest na vrtujak, ča je njon inače i sinonim za lunapark, kakvi, falin te Bože, jema sad na svakome kantunu. Sveti Nikola, Sveta Luce, Dida Mraz, Mali Isus, Djed Božićnjak i kako se sve još ne zovu sve one avetinje predbožićne potrošačke groznice samo ča nisu ... ili su već počeli ordinirat ...
A lunapark, ka lunapark, jedino ča je na malo bolje misto, na Poljudu, pa ne triba ulizat u grad .... ovi put Njezino Visočanstvo nisu zanimali vrtujci, ionako se na sve dičje izguštala, a na one velike je još ne molaju ... ali kad je vidila trampulin, oči su jon se zacaklile   
... srića da jon je visoka ograda okoli skakaonice pa nije mogla ispast ... nikako fermat ... a kako i neće kad već cilu nedilju trenira doma na trosjedu. Bidan trosjed ... ne znan je li mu gore kad se ja sa moji kvintal i nešto žive vage zavalin  , ili kad Vinkica sa svoji dvadesetak i nešto kili skače po njemu ka po tranpulinu  ... a kad se umorila da više nije mogla na noge stat, dobro je bilo i na guzi skakat ... kad je to provala doma pala je deboto priko stola pa jon je to odonda strogo zabranjeno ... do prve prilike 
... nisan se umorila, tata ... nisan ... dokle je nisan uvalija u njezinu sidalicu. Posli par stotin metri pisma sa zadnjega sica je naglo utihnila ... i nije se nastavila sve do babe u Kaštiliman ... Baš čudno ...
Uvik se sitin da reče naš svit kako je boje molat dite da se malo izmori, da će slaje zaspat ... pametan je naš svit, pametan!
A Vinka? Je li pametna oli nije, pokazat će se vrime, oću reč sve u svoje vrime, nećemo je nigdi upirat ... kako ča dođe na red, kazaćemo van, ka i ovo ... poslin par puti pokazani crta gori, crta doli, crta livo, crta desno ... eto, spojila je prvi par slovi ... moga san je naučit i koji drugi suglasnik, ali neka sve bude po tradiciji. Zna se koja će bit druga besida, je li   
Tehnika pastele na običnome papiru ...
Pozdrav svima i nadan se da ste dobro razmislili koga ćete zaokružit ...
Zdravi bili!     
|
