... da ne zamirite, i ja san, davno, obaša cilu županiju, i šire, sa mlaznicon u ruci i brentačon na kostima, ma koliko mi šutjeli o tome ...
E, i zaboravija san napisat, član sam DVD "Mladost" čin san uspija nagovorit mater da mi se potpiše na pristupnicu, od 1977. godine.
Postoju dva koncerta za koje nikad neću prižalit ča nisan bija ... "Dire Straits" kad su svirali u Splitu, isto na Gripe ... i "Klape na Poljudu", one prve, najbolje i neponovljive, koje su pokazale da nan ipak cila omladina ne sluša cajke.
Ča se tiče "Streitsa", to je bilo toliko davno da van, pošteno rečeno, i ne znan reč zašto u prvi momenat nisan odlučija poć. Tek kasnije mi je bilo žaj ... puno žaj ...
A "Klape" ... moga san i čut sa ponistre od kancelarije, a deboto i gledat, da san jema malo bolji kanočal (dalekozor, za sjevernjake), ali san mora bit na poslu, o doba kad je bija koncert. Jedna od ritki obaveza koje se nisu mogle odgodit
Ali zato sad nisan tija ništa pripustit slučaju ... i jema bit da mi je ipak osta bar trun sriće na mome kontu ... fala božici Fortuni i "Radio Dalmaciji", naravno stigla mi karta, kupija san nove baterije za fotoaparat da mi se ne dogodi ka još koji put, i spremno čekan ... evo i taman na vrata ... moje penziće, nema bit da ću ipak užicat auto za poć na koncert ...
Dimilo je, dimilo ...
... ali ne oko komina, vengo na Gripe u veliku dvoranu. Kad san doša gori, nisan moga virovat da je ovo sve svita krenilo na isti koncert ka i ja, kontan da biće jema još koji disko u blizini. Ne moreš auto parkirat ... jedva san naša mista gori na po puta do FESB-a
I polako, s noge na nogu, spustin se ja doli do glavnoga ulaza, a ono puno svita isprid bokete di se prodaju karte. A gori, na caklu, velikin sloviman piše:
RASPRODANO!
a ja ne mogu virovat svojin očiman, čak se more nać i koji švercer. Iznenađen, i to ugodno!
I već san tija ulist u dvoranu, kad vidin par poznati faca iz našega maloga mista, di isprid bokete beštimaju ča nisu ranije kupili karte. @Tica sa ženon ronje kako je bija u Budvu na Roling Stonese, a ne more ovod isprid kuće gledat Deep Purple. A @Miško sa nećakinjon @Malon_Okukon samo ča ne zadimi od grinte. Danas ću, sutra ću kupit kartu ... i ode vrime, a svi su se oni, ka i ja, nadali da u ovome gradu obožavatelja cajki ne more ni teoretski nestat karat za koncert stari rokeri ka ča je Deep Purple ... računala je i Fata ...
I ča ćemo sad. Ajmo spasit ča se more ... @tica i @miško će provat obradit one na ulazu, a ja, kako jedini jeman kartu, provaću uvest @malu_okuku ka ćer. Pa ne bi puno ni zalaga ... ionako smo jon njezin pape i ja generacija. Ajde ćerce, skini šminku na brzinu, i nakon nepunoga minuta kuvanja redara na vratima, bili smo obadvoje unutra ... a oni, kako se kasnije pokazalo, nisu uspili ulist do kraja. Ča ti je iskustvo
Kasnije mi je @miško priča da smo jedino Gibonni i ja uveli dicu na koncert
A tek kad smo ušli unutra ...
Baš je lipo bit mlad ...
SVE PUNO!!!, dobro našlo se mista za sidit, ali odma mi je bilo teplije oko srca kad vidin da još jema normalne omladine. Doduše bilo je svita ča je i od mene dosta starije ... ali bitna je omladina. Ča sluša doma ono ča su je pape i mater naučili. Pa kad se još sitin punoga Poljuda ljubitelja klapske pisme ... omar mi je lakše ... još u svići jema uja, još nisu sve izile Cece, Karleuše i domaći izdajnici ...
Sidili smo u korneru, po sredini dvorane, i ovo je najboje ča san sa ovin mojin aparaton moga dobit ...
Posli sinoćnjega koncerta siguro neću jemat problema sa kamencima na bubrizima, žuči i di kod se moredu stvorit ... nije falilo kilovati razglasa ... čak pinkicu i previše basa za moj ukus ... ali neka, od viška glava ne boli ...
Ispočetka san mislija, skupa sa @malon_okukon sać doli na podan bine, ne bi li učinija koju boju sliku, ali kad mi je počelo zunzit u ušima, lagano san od otega odusta ...
Nije falilo ni svitla, a ni kilovati razglasa ...
I tako prašu li ga prašu ... nisu fermali svirat uru i tri kvarta i onda su ka ono išli ća ... da, da, a bis ...
I naravno, a ča ćedu otpivat za bis ... baš san se čudija di nisu i ranije
... Smoke on the water ...
Možda bi ko moga promislit da je dvi ure malo za koncert, ali ipak vazmite u obzir da su to ipak malo stariji ljudi, koji su krajnje pošteno i profesionalno odradili svoj koncert izazvavši gomilu emocija i prisjećanja u mladih i starih, a virujte mi da je bilo i jedni i drugi ...
Evo, sad, (11:00) mi još zunzi u ušima, gren vanka malo na buru da mi pročisti ...
Zdravi mi i veseli bili ...
i "Radio Dalmaciji", naravno 
stigla mi karta, kupija san nove baterije za fotoaparat 
da mi se ne dogodi ka još koji put, i spremno čekan ... evo i taman na vrata ... moje penziće, nema bit da ću ipak užicat auto za poć na koncert ...
Ajde ćerce, skini šminku na brzinu, i nakon nepunoga minuta kuvanja redara na vratima, bili smo obadvoje unutra ... a oni, kako se kasnije pokazalo, nisu uspili ulist do kraja. Ča ti je iskustvo 
