Je, moreš mislit. E, sad ovod najboje gre ona ikonica ča lupa glavon u zid  , taman mi je ovako u glavi ...
Ajde, nije opet sve tako ajme.  Barenko danas ne pada kiša, pa san se opet lagano uputija na noge put Bele Zgrade, i naravno, put vrtliča.
Malo smo se nađirali ove dane ... a kad je padala kiša? Kako onda?
Onda nima druge vengo stat doma i gledat filmove. Samo ... jema tot jedan mali problem. Politički.  Pape bi diko pogleda televiziju, ali na TV je spojen i DVD player. Na kojega Vinka gleda svoje crtane filmove. Ali ništa ča malo dječje diplomacije uz umjerenu dozu korupcije ne more riješit.
Pa se crtani more pogledat na kompjuteru, i sidit na onoj stolici ča se vrti, i papat čikolaticu «Životinjsko carstvo» i slušat na slušalice. Kompletna usluga ...
... i svi mirni i zadovoljni. I Vinka gleda svoj film i tata gleda utakmicu, oli vijesti, oli ča drugo ... kad bi sve bilo ovako jednostavno, život bi bija puno lakši.
A kad nismo stali doma, onda smo malo išli po rođendanima ... u utorak, 26. 9. je Mirti bija rođendan. Prvi put san triba vodit dite na dičji rođendan u takvi namjenski kafić, koji organizira dičje fešte ...
Najprin san osta ka trica kad san vidija da kafić jema i video nadzor ...
... u današnje vrime nije lako uteć konobaru a ne platit račun. Samo još da konobarice jemadu i role da i lakše moredu vatat.  
Vidi se da je osoblje iskusno sa malon dicon. Najprin i je išaralo sa cvitićima i raznin sličicama ... dica sritna ki prase u malo vode ... Vinka ni danas ne da Zakonitoj da jon opere ovu ruku ...
... bilo je mali komadića pizze za mumat i sokova za bumbit ... a ni zabave nije falilo ... klaun je svoje pošteno odradija ... baca se po podu, potiza konop sa dicon, a nije falilo ni muzike za ples ...
... tresle su one dičje pisme do maloga Jacquesa Houdeka, a Vinki se najviše svidila «Kad si sretan" ...
  
... a na kraju je, ka i svaki pravi rođendan, sve završilo sa puvanjen u svićice. Hepiend, ka pravi Holivudski film ...
Mogu Van reć da san ugodno iznenađen sa svin ovin. Dica su pod kontrolon, moreš na miru proćakulat sa ekipon i tu i tamo bacit oko na dječicu ... šteta samo ča kratko traje (do devet manje kvarat) i ča moju Vinku nikako ne mogu naučit na tajming.
Koji sad vražji tajming?
E pa kad je bila spiza na stolu, jedva da se okusila. A pica nije da je bila loša, baš naprotiv, za prste lizat. A ona je okinila dva zalogajčića i amen. Da nije više gladna.
Vinka je li dobra pica?
Je, tata, dobra je ...
A zašto ne jedeš? ...
A kad nisan gladna.
Tortu isto tako, griz vamo, griz tamo i amen.
Ali zato mi je napunila glavu kad smo krenili doma. Da je ona gladna. A zašto nije papala kad je bilo spize na stolu.
A kad onda nije bila gladna ...
Tako da je doma, kad je došla, na opće iznenađenje sašila četiri male dičje hrenovke, koje jon je mama skuvala kad smo se mi uputili iz Splita i ja jon priopćija VInkine želje ...
Koja ubojita kombinacija psihologije maloga diteta, usto još i ženskog diteta. Znan, zvučin ka MŠP (Muško Šovinističko Prasence) ali ča bi vi, moliću lipo, promislili na mome mistu?
I još ča mi je napravila jučer.
Došli mi kod babe Sobodne, a nima nikoga doma ... na stolu četiri mandarine, sitnoga zuba, i ja je lipo pitan:
Vinka, oćeš li papat mandarine?
Neeeeee (uz složenu facu koja nedvojbeno potvrđuje odgovor)
Ajde, mandarine su ti baš lipe slatke ...
Nećuuuuuuuuuu!
I tu je diskusija pristala, gleda san još niko vrime mandarine i dokle si reka zum-zum, nima i više ...
Onega momenta kad san stavja zadnju fetu u usta, Vinka je izjavila kako bi ona papala mandarine ...    
Ali ovega puta se nisan da smest ... nikidan san babi sa Terminala donija cilu kajbu mandarini, tako da san zna da jema, i onda je Vinka dobila pun pijat očišćeni mandarini koje je morala izist pri vengo gremo doma ...
Nadan se da je svatila lekciju ... Ja jesan!
     
|
