Je, evo vas san se stresa, čujen da je gori kod @googoo-a, u Rijeci, izmirena najveća fibra okad se zapišije, i to 39. A zašto san se stresa? Zato ča znan da je ovod doli barenko dvi crte fibre više vengo u Rijeci. Uvik.
Ajme ča nas još čeka. Sad smo i krivi ako krepa elektroenergetski sustav, jerbo je svaka mona ugradila klimu, pa fala bogu svi sidimo popodne ispod onoga di puše ladni zrak i ne da nan se njanci nos povirit vanka.
Ovod doli kod nas život je između podne i jedno šest uri paraliziran. Meni se prvome ne da izać vanka, osin ako baš moran. Najteže mi je u tri i koji minut doć do doma sa posla.
Fala na pitanju, auto mi još nije gotov. Ne tribate mi ništa govorit, već san posla jedan šleper pun munja i gromovi na adresu direktnoga krivca za nastalu situaciju. Zadnje obećanje je da je u nediju gotovo ... vidićemo, u međuvremenu san bija uzet auto da ga ne zaboravin vozit ...
Ka ča smo već rekli, život počinje kad se Sunce približi zalazu ...
Nikidan je to u nas u Mašogradu bija dičji, «Mašograd fest». Deseti po redu. To je ipak tradicija koja se mora poštovat.
A pogotovo ča san tija i Vinki pokazat kako to dica pivaju. Doduše, nisu jon baš bili vršnjaci, ali kako je vrime pokazalo, Vinka bi puno boje pivala od dosta nji. 
Nakon pustoga iščekivanja i tlačenja tipa «... tata, kad ćemo više poć ...» nacrtali smo se na vratima u devet manje deset. Nisan zakasnija, za divno čudo. A nisan ni moga kad mi je jema ko napomenit svaki trideset sekundi ...
Najpri smo se morali slikat sa jednon teton, pa van eto na slici dva @vragusa, a koji je manji a koji veći, pokazat će vrime ...
Onda su se počele redat mlade nade kaštelansko-trogirsko-splitske estrade ...
... ajde, ovi mali je otpiva skroz pristojno, nisu me opuno uši bolile ...
A onda je tribalo vinki objašnjavat zašto one tete plešu a samo jedna teta piva, pa tako više puti, jerbo su mlade pivačice, po uzoru na svoje starije kolegice, jemale i prateću plesnu grupu.
Ajde, Vinka je guštala i cupkala mi na kolinu, a onda je došla katastrofa, jedna mala, nije fer i neću jon navest ime, toliko je tukla falšine, toliko je da prostite revala da mi je Story Super Nova u ranin počecima prema ovome parija ka Sanremo.
Da se razumimo, nikakve muzičke naobrazbe neman, i smatran to ka svoj minus. Pivat ne znan, pa se i ne prijavljijen na festivale ... ali ZNAN kad ko reve ili falije note.
Pjesnički rečeno, je da me ugazija tovar na uvo kad san bija mali, ali mi ga nije skroz naskroz satra, tako da mogu razlikovat RAFU od COCE.
I opet, da se razumimo, nima sad to veze sa muzičkin UKUSON, je li to pop, rock, jazz, šlager ... ali ONO TU VEČER ... ne znan kako bi to opisa a da ne ispadnen nepristojan, bezobrazan i još .... ne znan. Ne znan ča bi me moglo natirat da to slušan. Sad mi je jasno ono ča san bija pročita u nike foje, da Amerikanci muču Iračane muzikon. Sad znan i koju in muziku molajedu ... sigurno je i sinoć meju publikon bija i koji agent CIA-e koji je to sve sa pomnjon snima, da se more kasnije upotrijebit. I protiv nas, ako in bude tribalo ...
Eto, sad san miran ... od deset «Mašograd festova» vidija san jedan. Sad san miran za još deset. Osin ako Vinka ne propiva ranije ... pa buden mora, po zapovjednoj odgovornosti, slušat sve od početka do kraja.
Da se razumimo, nisu kriva dica. Nisu krivi ni organizatori ... dapače, sve je bilo za tu vrstu zabave napravljeno tip-top, ali mislin da su tu glavni krivci RODITELJI. Jer ta dica jemadu, bogu fala, i oca i mater, ali jema bit da se tovar i sa njiovin ušima bavija kad ne čuju kako in se potomstvo tuče sa notan ...
Dosta o pivanju ... sinoć smo bili u nabavu. Kupili smo mudantinice. I kremu za sunčanje sa najvećin zaštitnin faktoron koji san moga nać.
A za mudantine je demokratska rasprava potrajala malo duže.
Vinka je uporno tvrdila da su to mudante (gaćice)
A ja isto tako uporno da su to mudantine (kupaće gaćice)
I na kraju san ipak ja ispa tvrdoglaviji i uspija jon objasnit razliku.
Nima veze ča su jon na kraju te mudantine bile malane pa je Zakonita usput danas morala poć prominit za broj veće ... Tako da se jutros jemala u čemu poć kupat. I jemala se sa čin namazat ... Obziron na uzrast, to je još uvik TOPLESS kupaći , a dogodine ćemo nabavit dvodjelni ... pravi bikini ...
I nadan se da će se Vinka ove godine uspit okupat kako Bog zapovida ....
... a ne ka lani u babe u dvorištu u malome bazenčiću ...
Gren ća, toliko je vruće da su se čak i šefovi smilovali pa radimo samo do ure i po ...   
|
