A kako će bit nego dobro  ka i do sad, mislin na ove tri protekle godine. Bilo nas je od svukud, i povr i šoto Velebita, i virujte mi, niko, nije nikoga pita odakle je ...
Počeli su stizat još u petak uvečer, i di će na zborno misto vengo u naš društveni kafić 
... zanemarite ovega u crvenu majicu ča se na silu utiraje u sliku, samo in kvari prosjek, dobar prosjek  , ... i ka ča je, je li, i red, razminili su se na dolasku i darovi, @acivi je dobija novu igračku za kompjuter, i još par stvarčic za žuntu , da sad ne ulizamo u detalje  ...
... a tribalo je te ljude negdi i smistit, za što se pobrinija naš prišidente Ljubo i ostala ekipa. Zli jezici bi rekli da in je nacrt radija čovik iz tvornice sardini «Postira» sa Brača. Prvoga brača.
Kako bilo da bilo, niko se nije bunija, barenko ne na glas , a dobro je i ovo došlo za malo se odmorit sa puta ...
... i pripremit se za naporne vježbe u subotu, na Jadranovome igralištu. A tamo je tek bilo veselo. Skupilo se ja mislin više svita, vengo na Poljudu, di se nikako u isto vrime i igrala utakmica sa Belupon. Nerješeno ... mislin na Poljudu... a ovod, vidite i sami. Kako nan je mjesna glazba odavno pokojna, morali smo nabavit «uvoznu», koja je uz to i vatrogasna, DVD Cvetković, tako da su judi spojili ugodno sa korisnin, najpri su svirali pa se natjecali ...
... a i bolje da su oni odsvirali himnu, nego da smo je mi pivali, jerbo nas jema puno ča nas je tovar ugazija na uvo kad smo bili mali. Dunkve, počelo je u tri ure, pozapodne, recimo, jerbo kakvo bi to bilo takmičenje kad ne bi početak okasnija barenko kvarat od ure ...
... a podrška sa tribini ni ovi put nije izostala od «Torcide Mašograd». Dera se i trumbeta Rato sam ka tri razreda mularije niži razredi osnovne škole ... kasnije, kako je udrilo sunce u glavu i promili u glasnice, pridružile su mu se i mlađe snage, pa je na igralištu parilo ka da je barenko polufinale FA kupa u Ingleškoj ...
... a ništa nismo pripuštali slučaju, tako da smo i fotoreportere jemali uduplo ...
... a da ne govorin o obradi rezultata na kompjuteru itd. ča smo također jemali duplu opremu, a i prvi put okad to radimo, mislin na Slavena i mene, dobili smo sve potribne podatke na vrime i nismo rezultate gotovi vježbi morali tražit priko Suda za ljudska prava u Strasbourgu.
A kako je bilo na fešti uvečer? E, bilo je baš lipo, neka patu oni ča nisu došli, malo je pala vručina, bilo je u najbolju. Fažol je bija ka cukar, a ni kobasice nisu bile ništa lošije. A ko je ožednija, bija mu je pri ruci restoran «Kod tri Bračanina» ...
... i virujte, neka su bračani, nije falilo ničega ... pivo puno do vrja, a sokovi ledeni kako triba.
A muzika, koju su proizvodili Brane, Toka i Blanša, baš je bila po guštu svima, od borbeno-revolucionarnoga repertoara, do dalmatinski evergrini i slavonskoga bećarca. Uz malu ogradu ... osta san samo do deset uri, mora san poć leć jerbo san i ja bija na rezervi. Tako da san prispava i jutarnju misu, di je ustoličen Sv. Florijan ka četvrti svetac u našoj župi, 
A ovo je stvarno bila večer mirakuli ...
A kako, sad ćete se vi priupitat? Lipo, kad DVD Deanovec (Zagrebačka županija) piva na vas glas, i to dokle su još bili trizni «Dalmatinca» od Grdovića, i kad san doživija da Zagor tj. Moto klub «Adria» nekome bude sponzor, onda je sve moguće, pa se niman ča čudit ovemu ča je isprid mene plesa barenko deset minuti sa čašon piva na glavi bez da prolije iti kap.
Živili, i vidimo se dogodine! Pozdrav i sritan put svin blogerima, vatrogascima i ostalomen pučanstvu, ma gdje bili   I da ne zaboravin, sve slike osin zadnje dvi, slika je Željko Ban, a zadnje 2 moja malenkost, jerbo san ja, ka pravi fotograf, doša na misto događaja brez baterij. 
UPDATE ...
A rezultati ... oni su deboto ovod bili najmanje bitni, kad je dobra ekipa. Ali eto, kad već moremo pokazat, pogledajte i nji ...
 
|
