Sutra je ...
Sutra je Badnjak, oli Badnji dan, oli kako ga ko već zove ... neka cvate ijadu cvitov ... 
Sutra je Badnjak, a ja san danas prošeta sa Vinkicon priko Rive, išli smo i do potočića u Đardinu.
Jadan, skoro je i prisušija. Jedva san je uspija nagovorit da ne «svrati» u park di dica jemaju tobogane, ljuljačke, gingalice i ostale dičje potrepštine, koje je dalekovidni ugostiteljski radnik postavija, da mamice moredu na miru pit kavicu i držat dicu na oku. Mamice, i tu i tamo poneki tata, je li ... da ne bude jednoumlje, moliću lipo.
Sutra je Badnjak, a ja bi se danas najrađe skinija u kratke rukave, ali nije pedagoški radi Vinkice kojoj je ovo prvi izlet na frišku ariju okad je izasla iz bolnice.
A vrime, ka ča i vidite na slikan, ka u priči.
More ka uje. Ne baš ka @čuvitaru njegovo maslinovo, ali skoro ...
Mala se danas baš našetala, ča sa babon, ča sa taton. Toliko da je na kraju Gojače izjavila da je bolu noge pa da ne more više odit, sinjala je prvi zidić pa sela na njega. Čekaj tata da se malo odmorin ...
Ajde, sačeka san, ka da san i jema izbora, i kad je njezino veličanstvo odlučilo krenili smo dalje. Došli smo do mula, pa smo i tamo seli da se odmorimo. Guštamo u zalasku sunca, kojega nisan jema prilike snimit, jerbo tamo prolazi puno aut pa nisan od straja molava Vinku iz ruke ... Stiga san samo jednon rukon poslat bratu pomorcu poruku da smo na mulu i da guštamo na suncu, a dobija san uzvratnu da gren u materinu jerbo on gleda mul a akoštat ćedu tek izad Nove godine. U Hong Kongu. Baš mu je veselo. Barenko jema signala od mobitela pa more zajebavat bližnje priko SMS-ova.
Vinka već pomalo postaje političar. Ne more više odat. Bolu je noge. Nosi me tata. A pape jedva nosi i sam sebe. Odavna nisan ovoliku turu učinija nanoge. Oni ča me vidu, a znadu me da nigdi ne gren brez aute, zlamenaju se barenko pet puti. Činu mirakule.
Kad smo već kod mirakula, nikidan san predočija kolegan na poslu ča je to mirakul. ne jedan vengo tri. Još cenu od smija ...
Prvi mirakul  je da je Lj.M. posta prešidente od DVD «Mladost» iz Kaštel Sućurca.
Za neupućene, DVD nije ono sa čega se gleda film, vengo dobrovoljno vatrogasno društvo.
Drugi mirakul je da je moj vinčani kum, oni ča je inkartava kuću pri par postova, napokon podlega utjecajima okoline i kupija kompjuter. Ma nije to za njega, to je za maloga da se uči. Bla bla, truć truć ... kako mu kupus!
A treći mirakul? Treći i najveći je da san naša jaketu, zimsku, komodnu, i da ne triban dizat kredit za kupit je ...
Dosta bi bilo za večeras, ma stvarno ... laka van noć, i sritni blagdani, i sve najboje u novome litu ...
Da dosta, a ja zaboravija na božično drvce. Ili novogodišnju jelku, kako bi ga pri zvali, samo da se ne spomene Božić. Ka ča je ludi Smoje napisa u legendarnoj «Borbenoj ponočki».
Glede situacije sa stanon, nije mi se njanci dalo kitit bor, ali Vinkici napunili glavu, babe, dide, rodbina prijatelji, i ja moran kitit bor. Jerbo jon Dida Mraz nima di stavit oni poklon ča jon ga je donija. Je, reka san Vinki da san ga trevija u skalan i da mi je reka da če jon donit dar samo ako okitin bor. Vinka cila sritna izjavila da če mi i ona pomoć kitit. Puna entuzijazma, počela mi je dodavat balunčiće, ali je zaspala poslin trećega, pa san je mora onako usnulu, prominit, obuč piđamu i stavit leć. Mogli su jon tuč i činele oko glave ne bi se bila probudila.  Može bit da su je stvarno bolile noge danas od odanja, a i nije odrapila pozapodnevne dvi ure spavanca, da ne duljin, zaspala bi bila na lanceti da je bilo stavit. Uvalija san je u krpe, i eno je još spava ... spavajte i vi. Slatko! 
|
