U svoje je vrime baka imala korteđanata. Okupljali bi se na Vidilici s gitaron, ili na Pjaci di se uglavnom paradiralo, pa po Rivi... Mogla se bogato udat i birat. Ma ni tila. Ćutila se ka žena, ali bi rekla "nisan tila rađat patnike, a tvoj je dida bija uporan, ufff". Rekla bi mi: "Budi pametna. Završila si velike skule. Nisi ti žena za udaju i rađanje. Za tebe nije Split. Tribaš poć vanka!" A kad je vidila da nisan prston makla za maknit se iz mista ponovila bi mi: "Koja ljubav? To su trice! Samo pare, gospođice!" misleć da baren neću "promašit" i udat se za siromašnega vlaja.
Bija mi je poseban gušt, kad bi u babe došla dikoja prijatejica iz "Organizacije", misleći na "Crveni križ" i partiju. Slušala bi njiove razgovore, a baba bi me tirala, da ne slušan ono ča ne razumin. Sićan se tete Dragice s kojon se pokarala jer ju je ništo uvridila pa su se "razišle", pokojne tete Jelice s kojon je ostala u dobre jer se nije puno tendila u politiku, Barba Duška (stari pedofil) i tete Mare dobre ka kruv, sećerašice, tete Kitice s kojon je prekinula svvaku diskusiju jer je naginjala na HDZ, fizioterapeutice tete Marije koja je vidila svita i svita, pa joj je devedesete odma rekla da će jon propast Juga. Od tada se više nisu vidile. Ostala je dobra sa gospođom iz Savezničke obale (nije nikad naučila nova imena ulica) s kojom se poznavala iz "Fronte".
|