Spominjen se, kako da je ucera bilo...spala bi u svojoj zikvi a kad bi ti doša sa posla jo bi otvorila oci i pružila ti ruke.
Već 22 godišća te ćutin, ćutin te blizu sebe i kad nisi sa menon.
Velik si covik, to će svak priznat, ma neće oni kojima smetoš.
A znoš i som zoc jin smetoš.
Pape moj, sve tvoje rici pamtin, i one koje si reka meni i one koje govoriš drugima, pamtim čak i one koje uvik ponovjoš.
Ti si velik covik, znon da son to već rekla, ma nikad to nison rekla tebi.
Tvoje mišljenje mi je nojbitnije na svitu a tvoje krilo draže i od materinega.
Somo me zabolilo kad me nisi odve prid oltor, ti tvoj infiš moga si prigrist makar tad.
Ni me bilo lipo vidit di roven na don vjenčanja.
Ma son ti sve oprostila i zaboravila.
Somo se na tebe nikad ne mogu najidit.
Jer si toliko velik i toliko si bitan.
I ako niko neće, jo ću napisat tvoj libar, tvoje misli ću jo, makar mi bilo zodnje, pritocit u kortu.
Pape moj, fališ mi, svaki don, svaku uru, svaki minut.
Fali mi sest isprid Ateljea, popit kafu sa tebon i mucat, gledot u brode.
Fali mi da urloš na mene dok smo u poslu, jer somo tvoja kritika rezultiro uspjehon.
Pari mi se, da sve ca u životu cinin, cinin da biš ti moga komentirat.
A kad mi je niki don mater rekla da ti iz ociju i iz ustih ispado ponos radi mene, znoš, radi posla....umorla son dobota od lipote i radosti.
Ne gre mi ovo, opet rici bižidu od mene jerbo je ove misli teško pritocit u rici, al znoj, oče moj...
Znoj da te volin, barž i nojveće na svitu, da svaki svoj korak cinin radi tebe, da biš bi sritan, ponosan i zadovojan.
Znoj oče, da me stroh svaki tvoj rođendan, jer si godišće stariji, pametniji ali i nemoćniji.
Znon da ćeš ostarit, barž će ti i rici usahnit, barž će te i slomit vrime i oni koji te ne vole jerbo govoriš istinu.
Znon da ćeš me jednega dona ostavit.
A to boli strašno....želin te uvik kraj sebe, želin uvik tvoj lik imat prid sobon, a tvoju ruku na mojoj.
Ne doj se oče, ne doj se vrimenu i neverima.
Cili život si bi i osto svoj, nikad te niko ni moga slomit, pa ni neće, jer jo virujen u te...
Ti si moj porat, moje sidro, moj ribar i klik galeba povar mora.
Moj si mir.
Velik si oče, velik, zapamti to.
(Tekst je napisan na dijalektu, prevoditi neću. Hvala na razumijevanju)
Post je objavljen 25.10.2004. u 11:44 sati.