Pregled posta

Putnicë

Jël znätë kaj su putnicë. To jë onaj papér kaj veternär dä dok së blägo tréba voziti na plac za prodati. Növohrvacki putovnice su bivši (englezi bi rëkli former) pasoši. I oni su blägo. Čitam v Večernjäku da jë z Generalnog konzulata RH v Mostaru nestalo dvë i pöl do tri i pöl iladë putovnici. Sad jä vas pitam, kaj su të putovnicë kak pažul pa ak jë opala jëdna vreča z kamijöna ne splati së vozäču vračati natrag pöjnu? Sumnja së da su baš v konzulätu v utë putovnicë utipkävani podätki i da jë céna takvë putovnicë bila i do 3000 eura. Na brzinu sem si zračunal da bi to moglo biti i dëset i pol milijöna eura. Bem ti bigulicu. Lépi su to penezi. Lépo su si fuš složili naši diplomati, privatizérali su službu i služiju puno višë nek onaj naivac kaj sem ga v Gruntovčani videl. Sad verujem onomu gizdavomu Žužulu da jem trëba višë penëz za diplomatë. Ovi v Mostaru su si siročeki morali fuš näjti, a onu z Atenë zajebävaju kaj si jë malo boli i lepši nameštaj kupila. Tëško jë temi diplomati.

Ludi moj, al jä sem së tek sad zabrinul kaj bu z nämi. Svë jë višë siročekov kaj su na državne skrbi, imaju mälë pläčë, mučë së i délaju i nigdo jem to ne prizna. A mi, zločesti, špot i sramota na nas, srédna klasa, kaj imamu penëz ko blata sam së nekaj bunimu i još bi së prävdali. Mesto da čkamimu i mučimu i da budemu srëtni kaj državni siročeki očeju delati za tak mälë penezë i kaj su dost flëtni i sposobni da si fušeka kakvoga näjdeju.

A vidim jä da së i näčelnik naše špijunov tam prije motal. A morti jë on të putovnicë nosil ze Zägreba v Mostär? Pak si jë i on nekaj zaslužil. A morti jë na taj näčin skuplal lovu za kampanju za svojë sadašnë rädno mesto? Ne verujem jä da su si ovi v Mostäru së penezë zëli, sigurno su oni i tëkliću nekaj däli, pak su morali dati i ovemi kaj štämpaju putovnicë, pak su morali dati i onomu koji jë žmirel i né pital de su tulikë putovnicë, pak su morali dati i kojemu ministru, i oni su na sirotinjskem minimalcu. Lépo jë videti kak su si ti kaj pëlaju državu tak poduzëtni. Sam smu mi, närod, nedopovedani.

Jä si tak mislim da si i drugi državni službeniki buju fuša našli. Nëbuju së oni pod pëtë diplomatom däli. Näjlépšu priliku sad imaju policajci. Zäkaj jën policajec nëbi mogel nekakvu križajnu privatizérati? I näjne kaznë naplačivati? Ak bu delal za svöj žep sigurno bu puno kazni napisal i tak bu puno, puno pobölšal sigurnost prometa. Nëbuju oni više späli v avutu dok päda kiša. Pri privatniku néma zajebäncijë. Déla së i svëtek i pëtek i po vručine i po lednine. Da së oni gore nëbi zamislili kak jë närod počel tak puno délati prometnë nëredë, obrtniki policajci nebuju prijavili së kaj zarädiju. Morti buju sam 10-15% zaradë prijavili. Kak i svaki prävi obrtnik. I odma si buju pobölšali vozni park. Kakvë fijestë, si buju bemvejë, mercedesë i audijë vozili. I drugë zëmlë buju od nas kupilë taj jedini primer privatizäcijë pölicijë v svétu. Tak da bumu našu policijsku pamet skupo prodali. Kak budu puno zarađivali unda nëbu korumpiranih policajcof. I možetë si zabiti da butë za pär sto kuna zbegli kaznu. Si buju kaznu plačali, néma oprosta. Jedino si kolegë policajci-obrtniki buju med sobum kompenzérali dugovajna.

I tak, v ute bogäte države, si bu jën špijun v pënzijë rëkel säm sëbe: 'A së jë ovo počelo dok smu onu prvu putovnicu Legije prodali.'

Post je objavljen 30.08.2004. u 02:11 sati.