U malom dalmatinskon mistu pada večer, pred TVom baba i dida gledaju otvaranje Olimpijskih Igara… Dida: A ča je ovo? Ča je ovo, vid, vid ludeg svita! Baba: A bit će da su mačkare, hi-hi, vid ča su se zamrčili, opiturali, a ča je ovo gospemoja!!? Dida: Jesu ovo judi oli beštije, a vid ovega – leti!! Baba: Ma ne leti vengo su ga na kabel obisili! A bidan čovik ča mu rade – bacaju ga ka mandrila… Dida: Sav se zaplavija, biće da mu je ledeno aaa!? Ča veliš!?! Baba: Ajme gospemoja, ma vidi – ženska noseća!! A di su nju bidnicu doveli, ča je nisu pušćali rodit.. i još drob pokazije…Ajme, AJMEEE A ČA JE OVO GOSPEMOJA - SVITLI JON DROB!!! Dida: A ča je bilo, ča se zbil… Baba: AJME GOSPEMOJA! DROB, SVITLI JON DROB!!! A ča su jon to bidnici učinili, a ča je ovo – SMAK SVITA!!! O Gospe pomozi, o božesaćuvaj!!! Eno je na, nema je više, aha – evo su krenuli…
Dida: A ka će naši? Jel idu? Baba: Ma vidi ovega crn li je, crnjo di je ovaki pocrnija – Kost Ajvor?! Dida: Ča veliš – KOST I AJVAR? Baba: A je, je svašta more bit. Bidan sav se ocidija, biće da tamo nema šta ni jist… Kenija – e ovi ti samo trču, to ti je zato jer su pred lavovim bižali… Dida: Idu li naši? Baba: A vidi ovega, hi-hi, ka božemiprosti Mongol – šubaru na glavu nabija, a biće mu zima…a nu šeika, vid-vid šeiki, šeiki!! Njima nije vrućo… Dida: A kad će naši? Baba: AJME, AAAA… AJME GOSPE POMOZI!!! Dida: A ča je bilo!?! Baba: Ljudožder!!! Kanibal!!! Vid ga, vid kako je oči izbečija, kožu na se nabacija, gol pred sviton šeta – eno jesan rekla, jesan rekla – kanibal – i kopje nosi!!! Ki–ri–ba-ti… a ovi se nisu ni obukli! Vidi, vidi sramote a kako ih nije sram ovako prid jude samo u šugamanu, ajmeee ča je ovo… nemoral, šporkarija! A jesu li ovo naši…ček, ček, a jesu!! Naši su!!! Dida: Ča veliš, jesu naši!?! Baba: Naši gredu, naši!! A ča in je ovo? Ča su ovo na se obukli? Ma jel ono Tonći? Tonći!! Dida, vid Tonća našega, maše in! Evo Kinezi, a ružnih li ćunka… Dida: E? Baba: …Na-u-ru… Dida: Di na uru? Baba: …Pa-la-u… Dida: Di je pala? Baba: A vid Rusa – metili kapu od Lenjina, oli oni ne znaju da je on umra a? Od onega Silifisa - neznan čiji je ali mora da je bija zločest… evo in braće Srba. Eno ti ga tri prsta pokaziva – a ča će bidan ka ne zna drugo… Dida: Eno mu kopat nos sa njiman.
Baba: Ča sad ova priča, a gruba jezika – grube li žene, pravi muškić a ovi kraj nje sav se usuka ki komarac! Ča sad ovaj trče? Trče okolo sa ognjen, ajme budale, a ča mu ono prepreke stavjaju – aha, nešto govoridu – Prvi Svicki – AJME bidan, poskliza je!!! Dida: Ča se događa? Baba: A dobro je – diga se! Eno ga opet trči, a ča je sad? Drugi Svicki? ENO GA – OPET JE POSKLIZA!!! Dida: Poskliza je? Leži? A ča to govoridu drugi svicki? DRUGISVICKI!!! Eno ga – pokosilo ga, leži, gotov je!!! UBILO GA BIDNOG!!! Eno pali, pali, sve gori… Ajme ča je sad ovo – bonbe! BONBE, BONBE – eno ih sve pobilo!!! Eksplozjuni, bonbe, bonbalo ih bonban!!! I Blera, i kralja Hoseja i Sofiju, i HosejaSamarana, i našeg Tonća… sve ih pobilo!!! DRUGI SVICKI! DRUGI SVICKI! Dušmanin nan ubija olimpinjski duh!!! Baba: Ma nisu ti to bonbe, to ti je oni vatrimet… Dida: Ma ča nisu bonbe – kad vidin da je cili stadijun bonbilo! Drugi Svicki! Davaj mitraljiz! Drugi Svicki! Luce – vad mitraljiz ispod posteje!! Vadi moga Šarca! Baba: Jadna ti san! Dida: Luce, muč´ ka san ti reka! Šarca vamo!!! FILIKI HETERIJA! Gren tuć dušmanina! - GREN ´SLOBAĐAT ´LIMPIJADU!!!