Pregled posta

Cucek i cirkva su mu bili së

Čitam da su lovili manijaka kaj jë decu v Belovaru napal. Näslov v Večernjäku jë "Osumnjičenom mladiću pas i crkva bili sve".

Cucka niš ne krivim. Nëzna së spominati i né mogel niš napraviti za bölë zdrävlë svojëga gazdë. Vidim da në cucek vëč jë kusa, zovë së Minea. Napadäč jë bil sramëči dečec, miren, mrävca nëbi zgazil i redovito jë v cirkvu išel. Čak jë i miništrant bil. Doktor Frojd v mëne së vëč samozadovolno smejë. Slučaj jë bister ko suza.

Sramëči dečec jë imal svöj svët koji jë više sličil na präznu sobu v koje jë bila jëdna slika i jëdna kusa. V praznine të sobë prekopitovälë su së i kipelë nëgvë frusträcijë. Kojë jë maksimalno skrival. Sigurno mu së sviđala Minea, ali së né ufal nëzinu sliku deti v svoju sobu. Ali zäto jë kusu nazval Minea. Ziher jë imal seksualnë frusträcijë. Kak jë bil tako pobožen ziher né ni drkal redovito. I sva ta para mörala jë negde zbiti vän.

Otec od dečkov veli da së nëgva deca nésu nahitovala z kaménjem na kusu. Tu jë pokäzal kak ne pozna decu. Skoro se dece jë takvi sport normalna stvär. Ne postoji muško détë kojë së né na nekoga z kamenom nahitilo. To nahitävanjë ne opravdäva nëgov zločin, ali jë sigurno räzlog zäkaj jë on decu napal. Takvi sramëči i mirni së ne tučeju i ne hrvaju ze svojemi vršnjäki pa unda kad jem prekipi napadnu sam onë kaj su puno slabeši. A i ne kužë së v zafrkänciju, nigdo së ž njémi ne zafrkäva i svë doživlävaju prëveč ozbilno.

To kaj sem prečital v novinami mi govori da jë dečko bil mentalno zanjihan, slabeši. Za taj nëgov čin odgovorati möra i nëgva okolina a dél krivicë ima i cirkva. To kaj bi bi popi šteli da mlädi sam v cirkvu ideju, a na v birtijë i na zäbavë, govori kak su së oni distancérali od prävoga života. Župniku jë väžno da jem deca döjdu na mešu, a opče jem né väžno kaj jë v nihovemi glavami. Malo koji župnik ili kapelän si dä truda da së z decum kaj dolazë v cirkvu spomina kak z sëbe rävnemi. Dosta popov si študëra kak jë još navék srédni vék i postävlaju së previsoko pred svojemi verniki. Pogotovo jë to pogrešna taktika z decum kojemi jë v opisu rädnoga mesta da ne trpë autoritetë.

I tak župnik samozadovolno gledi punu cirkvu decë, a ne razmišla kak su oni tu zäto kaj jem on nëbu däl potpis z verunävuka ak nebuju svaku nedelu pri meše. A kaj jë v nihovemi glavami to i ne razmišla. Ali bu tu i tam pripomënul kaj nëbi smelo biti v temi glavami.

A deca kak deca. Jä sem ko dečec volel v cirkvu iti. Deklicë su si méšno obléklë, nektëremi jë to bil jedini dän v tjednu kad su së opralë. I dok su onë, tak dišëčë, potiho šaptalë na drugem kraju cirkvë i skrivečki nas pogledovalë, mi dečki nésmo mislili kaj svečenik govori. V našemi glavami su bilë sam dišëčë slikë deklici z drugë stränë cirkvë. I to je čist normalno. A bil jë z nämi i jën Filip. On jë bil sramëči i mirni dečec. Nigdär né priznal da i on deklicë zaglëda. Bil jë vréden, al bi ostal stäri dečko da së jëdnu nedelu né vubil z kuburum kaj ju jë söm napravil.

Ovaj napadäč sigurno nëbu dobil prävu kaznu jël së bu pokazalo kak on né mentalno zdrav. I onomu kaj jë vubil švedsku ministricu, onu lépu žëjnsku, sad së pokozalo da morti né baš pri sëbe. Trébaju li takvi služiti punu kaznu ili trëba jem popusti radi nihovoga stäjna?

Jä mislim da jë tréba na punu kaznu osuditi jël nihov zločin poradi toga né ništa mëjni.


Post je objavljen 01.08.2004. u 23:50 sati.