Ma neeee…...nije to o onoj na koju ste prvo pomislili (i brže boje blaženi cerek,sline na usta…radoznalost da.ča će sa tu bit nešto novega) – bem ti miša, više poštene cure sa sela ne smidu reć oklen su,a da jih judi onako odoka ne odmire sa brezobraznom priposmisli!!!
To sam ja tila ka sebe opisati, al mi se čini da sam naopako počela jerbo san ja, za istinu reć, pravo gradsko dite. Ali sam se danas tako oćutila olit ositila kad sam bila u Grad…ma mislin u centru , jerbo svi mi kad rečemo -iden u Grad- zna se na ča se misli…barenko mi ča ono ka, ajmo reć, živimo u ovim novin gradskin spavaonicama .
I tako ja bila nekin poslon u Grad i dogovaran sa jednin prijateljen di ćemo se nać na piće. Di si- pita on…ja kažen di san …OK onda je najbliže da se nađemo u Nostradamusa-kaže on.
Blek, blek-bleknen ja…di ti je to (a u ovoj glavuši signali migaju da mi je to straaaašno poznato )…ma kod kazališta - reče on….opet blek,blek…ma di, ma kud, jel ispred oli ozad???
Elem, da ne duljin, puten do kazališta svrnen u neki dućan i kupin malo kozmetike i priupitan onu malu prodavačicu – a di je Nostradamus – uto i ona malkice blek, blek… pa se stane smijat …Ona bidna mislila najpri da pitan za neku kozmetičku liniju (eh, ča ti je profešionalna deformacija)…i reče ona – ma to van je tu na Cankarjevoj.
Eeeeeeee, uto oni signali u glavuši proradili…ajme gospe moja…ajme žalosti…ajme tugo moja…od kada ja to nisan Grada obašla (a tu san na par koraka radila do prije 8 godin kad nas ono prebacilo vanka Grada radit) :(:( Kako već vanka Grada i živen (u ovin spavaonicama), onda mi dnevna ruta kuća-posal-kuća ni dala baš velike prilike za odit po Gradu…pa san pomalo sve pozaboravila ča je di u njemu.
I kako onda da ne rečen da san ka ona gore spomenuta u naslovu … divojka sa sela !!!