Pregled posta

Nula promila d.b.o.

Poduzetni duh jë predelal v nämi dok smu së čëra v kleti spominali o növomu zäkonu o prometu.

"Ma baš jë në briga za broj mrtve na cestami, njemi jë näjvëča briga kak napuniti proračun i zvléči od sirotoga näroda kaj višë penëz", Bläž jë prvi započel diskusiju.

Mi smu së slagali ž njém pak smu samo mučali i pomalko vuživali v kapljice. Dok još moremu.

Bikek jë vëč imal razräđen poslovni plän: "Kad uvëdeju to da së z mlädem vozäčem möra stareši voziti, jä bum osnoval firmu kaj bu jëftino iznajmljivala penzionérë mlädem vozäčem. Vëč sem jä ispital tržištë rädnë snägë i videl da bu za 50 kuna skoro svaki prosečni penzionér célu nöč sedel na suvozäčevom mestu. Ali kak mi jë jäko žal jadne penzionérof unda bum dél zaradë potrošil na tečaj 'Kak preživeti prometnu nësreču bez suvišnih pitajna'. Tak da mi ne pogineju delatniki svaki put kad jem mlädi vozäč zleti z cestë v grabu."

"Svë jë to v rëdu, möj Bikek, al kaj bu z nämi? Sad višë nëmreš kapljicu ni posmuknuti, vëč ti bu policajska svirala, v koju pušeš, zasvirala." Bläž jë odma počel tëško gukati dok si jë pomislil kak višë nëbu smel piti. Ma kakva pijača, višë nëbu smel ni prismuknuti.

Ali tu sem vëč jä našel izlaz iz tëškë situacijë.

"Dečki, nëmojtë së sekirati, jä sem zmislil kak bumu mogli smukati a možda i koji put lezunuti."

Kokotiček së jë odma z mräka javil: "kojë to budemu smukali i lizali?". Čém jë čul da né réč o žënami vrnul së jë v svoju kmicu.

Si su odvrgli svojë kupicë i čekali da čujeju kaj budem rëkel.

"Böžji lobi, pardon svečeniki, su vëč povëli kampanju da së oni izuzmeju od zäkona. Njemi jë v opisu rädnoga mesta da si popijeju malo vina, a kak dnevno imaju višë rädnih zadätkov unda jih zäkon ozbilno sprečäva v nijhovem poslu. Kak smu mi katolička država unda së nijov gläs sigurno nëbu sam tak zavrgel i ignoriral."

Tu sem napravil dramaturšku pauzu pak sem nagnul kupicu. Si su mučali. Čak së ni muvë nésu čulë. I onë su sëlë da čujeju kak da näjdeju izlaz z të situacije.

"Čém së v zäkon pregura božji-svečenički amandmän mi bumu osnovali növu versku zajednicu i si mi kaj smu tu bumu postali svečenici božjë kaplicë i v opis posla si budemu deli da möramu piti. I tak čém policajec zvadi balön za puvanjë mi mu, kak äsa na cenericu, pokäžemu svečeničku dozvolu i nëmreju nam niš."

Muvë su počelë opet leteti, skužilë su onë da su ionak premälë da jih policija po noći zastavi, a i dozvola jim jë prevelika za nositi.

"Naša verska zajednica nëbu zaprta, primali bumu i növë članovë. Svečenička obuka i ispit së buju naplačivali i od toga bumu financérali izgradnju kléti Böžjë kaplicë i nabavu liturgijskë tekučinë."

Si su počeli pleskati. Tak jë i službeno potvrđen i odobren program za našu versku zajednicu.

"Prosim lépo da së odma v program vrgnë amandmän kak jë obavezni dél svečeničkë obukë i okäpanjë trsja kaj ga ima viši svečenički rëd tj. mi", Bläž së požuril osigurati opstojnost prävë domäče kaplicë. Odma smu si zglasali taj amandmän. Znämu mi kak jë denes tëško näjti težäkë za trsje okopati.



Post je objavljen 15.07.2004. u 08:46 sati.