Jedna zagrebačka lokacija piše drugoj: veliki župan Zagrebačke županije, Nikola Škrlec (sponzor Škrlčeve ulice), piše zagrebačkom biskupu Maksimilijanu Vrhovcu (onome s Vrhovca i iz Maksimira).
Dragi prijatel!
Pun je Zagreb, da ja dobim administratora ali Bedeković Franceka, ali Oršića. Z jedne strani dvojim od toga, kajti ti, ki si blizu pri zdencu, iz koga bi to dojti moralo, nikaj mi josče od toga nisi obznanil; iz druge strani vendar moguče mi sz vidi, kajti previđevam vsakojake novine po miru, za koje ispeljati znam dar tersili se budu spraviti zaufane ljudi na onu čast ku ja obnašam, ne samo pri nas, nego i vu Vugerske zemlje. Prosim te obznani mi jeli kaj vu tom dugovanju, da se bum znal ravnati.
Da mi ne bi bilo za one 1200 RF koje bi ztem načinom zgubil, ne bi si skoro nikaj stem glavu terl. Ovak ne morem tajiti da ti zgubiček bi jako čutil. Zato prosim te, dragi prijatel, išči ako moreš to kak preprečiti. Znam dar vzemu za praetextus moju gluhoču. Ali spomeni nje, kaj im to pači, da vide da i poleg nje posli bolje idu nego budu išli pod kemgoder ki na moje mesto dojde. Spomeni njim špital, orphanotrophium, koga taki kak špital se dokonca genuti kanim i koji, ako ja otidem, segurno vustane. Zajdnič uputi je da po one machine, ku mi preskerbiš, y gluhoče moje se pomore.
Ako vendar ze vsem tem ne bi nikaj mogel opraviti, prosim te, tersi se konč to opraviti da mi se pol plače ostavi. Za on mali trud koga si administrator, kak previđevam, jemal bude, more content biti z polovicum.
Ako je za isto samo med Bedekovićom i Oršićom pitanje, iz ljubavi proti tvoju domovinu y kraljevsku službu, pripomori kaj moreš da bu raiši Bedeković, ar on konč ne pokvari kaj sem ja pri varmeđe naravnal. Ako on ima biti, ufasem da ako mu od moje strani proponuješ i nagovaral ga budeš, da on sam pristane na polovicu plače. Ova ti zato tak zaufano pišem i prosim kajti za tverdno deršim da tvoje proti meni prijatelstvo je tuliko, da vu poslu nad kojem mi je tuliko ležeče, najdeš ti način z kojem se vu njega puščati buš mogel, ako prem on tebe izdraven ne dotiče. Prosim te odgovori mi taki, ako nikaj ni vu dugovanju, da bum mirneši: ako pak je, obznani mi stoprav onda, kada posel vre napneš, kaj se ufati morem. Zbogom.
31. Octobris 1797.
Post je objavljen 16.06.2004. u 00:51 sati.