Marketing
DA SE NE ZABORAVI - CRIŠNJA
Gedan ove dane sve pijace nude crišnje. Govore da nisu rodile ka prošle godine i zato im je cijena da covik ne more verovat. Kilo crišanj je dosizalo i do dvajset eura. I sve jedno su se prodavale.
Tornalo me to na našu staru pijacu di su ove dani oko svetog Antona banci bili puni lipih zrelih crisanj. Malo je ki, a pogotovo dica moga odolit tom lipom plodu, još kada su bile onako jako crvene.
Od kuda dolazi ta beseda? Neki za crišnju još receju črišnja pa bi nas to moglo vodit ka engleskoj besedi za crišnju: cherry. Možda se tako ta beseda ustalila meju namin. Ki se još ne sića poznatog likera Cherry brandya?!
U nekim dokumentima pronalazim da ta beseda dolazi od staroslavenskog jezika, pa tako se u mađarskoj izgovara čerešenie – czereszenye ili po naši črišnja. Možda smo i mi dali ku besedu ku su preuzeli drugi narodi.
Sezona crišanj je kratka, zato uživajte u njima dok ih ima. Najviše su critni oni ki imaju doma svoju crišnju pa ih možeš ist u bilo koje doba dana. Zato mi svake godine ostavimo vikend kako bi se u Istru mogli poć naist tih lipih i svježih crišanj. Je da su vo godišće lošije i manje su rodile, ma smo sve jedno uživali u crišnjama.
Post je objavljen 14.06.2023. u 11:35 sati.