Marketing
DA SE NE ZABORAVI - GALETICA
Ove dane smo uz topli čaj, a uz topli čaj uvik lipo dojde nešto slatko pojist. Tako su mi napamet pale domaće slatke galetice ke je pravila moja mat. Kad bi reka da je za te galetice tribala mašina za mlit meso morebit mi nebite verovali. Tribalo je imat samo nastavke koji su mogli stat na mašinu i ispadale su fine galetice.
(foto: Brankica Bubanko, Oblizek)
Na pocetak kad se sprave, zna se, galetice budu tvrde, a onda se nakon nekoliko dan kada odstoje postaju lipo meke i užitak ih je ist. Cuvaju se u limene škatule i ne nude se samo uz čaj, nego se mogu ponudit uz žmujić prošeka ili rožoja.
(foto: Facebook)
Ti prhki domaći keksi ke mi zovemo galetice dolazi od talijanske besede (tal.galetta), u standardnom jeziku je čajni kolačić, ke zadnjih godina doživljavaju kako to danas recemo come back, pa se tako više ne može dogodit u ovim našim primorskim mistima da za vrime adventa ne nude i galetice upravo ovakve kako ih je spravljala moja mat.
(foto: Facebook)
Nabasa san na jednu recetu kako nacint galetice i cini mi se da je po takvon receptu i moja mat radila galetice.
Ta receta glasi: 90 dkg oštrog brašna, 20 dkg cukara, 25 dkg masti ili margarina, 4 jaja, 1 škartocić cukara od vanilije, naribane korice limuna.
Peceju se destak minuti i triba vodit računa da ne zagore.
(foto: Miljenko Brezak, Oblizeki)
Na vamin je da najdete stare mašine za mlit meso i da specete galetice. Tako su obične da jednostavnije ne moreju bit, a nikada nisu šle vanka mode.
Dragi moji, nadan se da ćemo i ovo vrime blajdani blagovat uz društvo uz dobar žmuj prošeka, more i dobrog vina ili čaja kako ki voli uz nezaboravne galetice.
Post je objavljen 12.12.2022. u 14:19 sati.