Marketing
DA SE NE ZABORAVI – FACOL - FACOLIĆ
Možda bi se moglo reć da je facol brend osmišljen na ideji stare tradicije naših žena u Dalmaciji, naše nane koje su svakodnevno i u svim prilikama nosile facol na glavi, još dan danas imamo starih Paškinja koje ih nose, ali sve manje. Tribamo ucint sve da facol ostane del prepoznatljivosti našega grada isto kao i čipka.
(foto:A.Zubović)
Facol je beseda ka dolazi od talijanskog jezika (fazzolo): Moja je nana nosila na glavu cerni facol. Interesantno je za spomenut da su Paškinje imale facol za šajdan i za blajdan. Taj facol za blajdan su koristile u rijetkim prilikama a najčešće kada su hodile u crikvu na misu.
Vrime je karnevala, parićiva se za maškare triba i narodnu nošnju parićat, a naša paška je nezmisliva bez facola. I na muškoj i na ženskoj nošnji facol je nezaobilazni del. Taj facol je obično od svile u svim mogućim bojama. Interesantno je da su muški nosili facol i oko struka i na ramenima.
(foto:screenshot-internet)
U gradu Pagu koristi se i facolet (tal. fazzoletto), ki se radi od popelina s elemantima paške čipke koji resi tašku od muškog veštita. On je danas zaštitni znak svake svečanosti i retko ki Pažanin da ne stavi u tašku od veštita facolet.
Premda neki govriju da je to facolić, međutim facolić je maramica, rupčić. Kada sam bio prehlađen znala mi je mat reć: uzmi facolić sa sobom šopojivce.
(foto: izvor internet)
Kad se u Pag rece facol, to je svetinja, i ni to samo svetinja od narodnih običaja, facol je svetinja od najlipše tradicije ca su ostale od naših pranana i nana, naših materi, da se nikada ne zatere dokle god je grada Paga, ako ništa drugo a ono kada se gre užgat Marka, kada divojcice i divojke i svi oni ki placeju Marka sacuvaju facol radi običaja i jubav za svoj Pag.
Post je objavljen 15.02.2022. u 11:16 sati.