Pregled posta

ZAMUKA SI BEBIĆU

Pred neki dan me jedan prijatelj pita: umro ti je onaj prijatelj što si o njemu pisao? Ma ne, to su mnogi povezali s mojim prijateljem trenerom. Nije to taj, ovaj je Pažanin. Cujemo se ja i on svo ovo vrime moje bolesti i pandemije, na pocetak mi je zamira da ga više ne spominjen, kada san mu sve objasni, malo je kalma, ali sve jedno me svaku malo ubode.
- Bebiću zamuka si, ni mi to drago. Razumin ja tebe da ti ni lako i da te ni voja ali to ne znači da fermaš pisat, to te more rivat samo naprid. Pored svega vidin da nisi odusta ni od televizije ni od novina i meni je drago da je tako.

- Kad su me zvali malo san misli ca ucint i kako će se to protumačit ali coviku je drago da te se sitiju da si u u ton sportu nešto ucini. Puno se judi javilo nakon toga na kih san već i zaboravi, pa te sve to torna malo nazad. Reka mi je jedan fotoreporter Novog Lista ki je sada Dondolaš sa mojin Mateom, da me dugo zna, ali da ni ima pojma da san radi u Šibenik.

(finale Kupa Radivoja Koraća: Šibenka-Limoges; Padova 1982. s Draženom Petrovićem)

- Vidi san da je Mateo parti sa Dondolašima. Geda san ga na RTL kako govori, pa san reka:- ne pada jabuka daje od stupa. Kako je lipo tečno govori, baš mi je bilo drago. Kako je on zaluđen sa tin Dondolašima?!

- To Ti ne mogu opisat. On celu noć ni spa. Svaku uru vrimena je pita:- je došlo vrime? Spi Mateo, sutra ti je celi dan dondolat, ali nisi ti to njemu moga reć. I on je sutra dan u subotu proša dvajset kilometri, prebi se je ali ne odustaje. I svi ga tamo voliju, to ti ne mogu opisat, koda je sto godišć tamo. On je od malena zaluđen sa tin Dondolašima i uvik je govori da kada bude veliki da će bit Dondolaš. Ni puno pasalo.

- Jesi bi slikat?
- Ca sumnjaš? Da me je ne znan kako bolilo bi ga poša slikat. Jutro san ga isprati ispred doma na Čavli, pa smo onda ja i Tea bili na jedno dva tri punkta di dojdeju. Navecer više nisan zna za sebe a noga mi je bila naduta ka baraban, ali san sercu mora dat navoju. Ne moreš verovat kako se derži do toga ovde na Čavle, već san Ti reka ko Alkar u Sinj. Ove godine smo mu morali ucint i novu monturu jer je preresa staru i dobi je novo veliko zvono. Sve to košta prijateju moj ali da košta ne znan koliko mi bismo mu to ucinli koliko on to voli.

- I u Pag su pocele maškare?!
- Ne znan, niti me je briga. Oni doli isto imaju udrugu kao ovi Dondolaši pa ne sumnjam da će se okupit. Ako su me prošle godine poslušali sa onim konopom verujen da neće ni ove godine bit drugacije. U Pag uvik malo kasnije pocimje karneval.

(foto:Elvis Šmit – blog KomunistStar)

- Vidi san da si pisa o Dušanu Paru.
- Onaj dan kada san doša iz Zagreba sa zračenja, Dušanu je bi sprovod. Misli san da ću možda poć na sprovod. Ja san bi nikakav i taj dan je dažilo, ona livica pa san se boja da samo još gore ne ucinim sebi. Kada se sve malo stišalo i kada san doša malo sebi, bili smo ja i Mateo u Opatiji užgat mu šteriku na grob. Duško je namin puno pomoga kada smo osnovali Nove Horizonte i od tada smo ja i on ostali u kontaktu.

- Puno je on ucini za Pag, koliko je lipih pisam ostavi.
- Ne mogu ti reć koliko je bi zaluđen za Pagon. Critili smo se jedan put ovde na Čavle jer je napisa neku pismu za festival „Gobnička skala“, pa mi je govori kako ima nešto zemje u Pag, pa da bi sti doli nešto ugradit ne radi sebe nego radi sina i nukov jer da kada njega ne bude oni sigurno nećeju hodit u Pag.
- Ne pišeš više paške besede a spomenuli su te na Radio Pag, neki profesor koga je Škofunaro dove u Pag.

- Da presluša san tu emisiju, i drago mi je da je to covik primjeti. Ima judi ki mi govoriju neka to složin u jednu knjigu, jer da je to dobra ideje da se besedu pokaže i slikon. Ivo Pavina je u Novi List isto napisa jednu crticu o tome kada je predstavlja rječnike ki su svi izdani do sada na otoku. Deset godišć pišen te besede, možda san moga malo više napisat ali i ovo ca san napisa je puno obzirom na sve okolnosti ke su se dogajale.

- Ne daj se Bebiću samo naprid i sam znaš da nas ima puno ki te pratimo i kima je bilo drago to ca ciniš. Niti u bolesti nisi ferma pisat. Dok si bi u Prag si pisa. Sto put san san sebi reka, kako ga je voja pisat. Poša je gori po zdravje a on piše o Pagu. Pusti Pag na miru sad, misli na sebe Bebiću a opet mi je bilo drago pročitat to ca pišeš. Nisan verova kada si mi reka da je jedna Paškinja ka žive u Riku, i ka ima ko godišće, stila da je dostaviš sve te besede da pročita.
- E, to mi je posebno bilo drago.
- Bebiću cuvaj se, neka te vrag ne nosi vanka dok je ovo ludilo, neka Matea mat vodi na Dondolaše.

Verujen da će mu serce bit na misto kada bude pročitao ovaj post. Reka mi je da će mi nabavit jednu skutu pa da će mi donit. Sada cekan da ta skuta dojde. Gremo daje.



Post je objavljen 14.01.2022. u 16:24 sati.