Pregled posta

OTOK NOVALJA

Danas san odluci poć do grada, toliko se toga dogaja u grad pa bi bila šteta to propustit. Gren ga zvat ako će doć do grada.
- Ca je Bebiću, ca se dogodilo?
- Gren u grad pa da te pitan ako ćeš doć popit kafu.
- Oću, kako ne, samo mi ti fališ.
- A, dobro kako očeš, ja gren do grada da vidim ca se to dogaja, ipak smo mi Fijumani. Mi imamo berdo sveti Vid a Riki je sveti Vid zaštitnik. Vidiš kako se ovdi slavi dan grada, celu šetimanu. Isto ko u Pag.

- Moreš ti bit ca god oćeš ali ja Fijuman nikada. Vidi san da si bi na promociju knjige „Fijumani“ dušo prodana.
- Zato živeš celoga života u Riku. Ti si stanovanjem Fijuman. Sve ca si u životu steka, steka si u ovon gradu. Vidi si da nisan bi jedini Pažanin ki je bi na promociju knjige.
- Vidi san, a bilo bi boje da nisan. A ca se tiće toga da celi život živen u Riku to imaš pravo. Nego, reci ti meni kadi ćeš bit.
- Ca me to pitaš, vajda znaš di ja pijen kafu.
- Ajde nać ćemo se na Korzo za pol ure san u grad.
I tako dok san se ja parića, još moraš nać parking kada dojdeš u grad, pol ure pasa da se nanka ne okreneš. Na putu prema Korzu naleti san na predsjednika Fotokluba Rika gospodina Božića pa san i sa njin osta malo u čakulu. Oće da se učlanim u foto klub, još kada mi je vidi aparat u ruke, govori vi se ne odvajata od vašeg aparata. Ni san ni dobro uvati misto vidin ga di stupa prema kafiću.
- Bome Bebiću berzo ti dojdeš od Grobnika u grad.
- Kako ki put.
- Fali ti kompanjon Musa?
- Kako mi ne bi fali. Bi san pošpijat ako sedi na svoje misto, ja bi ga uvik pita ako će bit u kancelariju kada bi dolazi u grad. Ne mogu verovat da je pasalo godišće dan da ga više nima. Toliko se veseli da ćemo se vidit i vidiš kako je sve sveršilo. To ti je život moj kompanjo.

Se je do mene, narucili smo za pit i razgovor je poca odmah sa njegovim potikanjem ognja. Ni miran ako me ne užge.
- Gedaš ti televiziju Bebiću?
- Gedan!
- Onda si prati izbori pa te neću oko toga napinjat, nego reci ti meni jesi geda izjave ovih novih političara ca su pobjedili? Jesi su cu tvoga hadezeovca novog župana ličko-senjskog da će mu najveći naglasak bit na otoku Novalji, da se županija mora više okrenuti turizmu.

- Cu san i malo je falilo da ne pojden u središnjicu HDZ-a i da se ne ispišen iz stranke. Niti ga je novinar upozori da taj otok ne postoji, baren ne još za sada, niti san posli toga pročita da se je izvinu judima ki živjeu na otoku Pagu. Ca da ti recen, a zna san ja da si ti to jedva doceka kako mi ne bi da mira.
- Da mi ga je bilo lupit šakon u glavu, ja mislin da bi mu se svi možjani stresli, pa bi se morebit siti da otok Novalja ne postoji.
- A jesi primjeti još jednu stvar. Niki od paških otočnih čelnika se ni očitova i upozori toga gospodina da se upiše ponovno u osnovnu škulu i da uci predmet ki se baren u naše doba zva „zemljopis“. I tako ćeš ti lipo za ki dan na otok Novalja baš ti zamiran.

- Samo ti zajebavaj. Nego da te pitan, ca ne greš na slikivanje „Robinje“.
- Koliko mi samo mira nisi da za Facebook, a sada kada imaš profil ne skidaš se više sa Facebooka. Po celi dan samo si na Facebook. Iako je Škofunaro u mejlu koga mi je posla napisa da ću bit obaviješten o svim aktivnostima, ja san vijest dozna preko Facebooka. Ni na Radio Pag ni bila ta obavijest. Kome služi taj radio? Neću bit u mogućnosti poć u Pag se slikat, malo mi je krivo ali život gre naprid. Ako me spomene u monografiju ku parićivaju, ja ću bit kuntenti.

- Bebiću meni je drago da si ti bi del „Robinje“ pa makar samo suze tra Robinji. Nosiš lipe uspomene sa sobom. Onako kako si ti pisa na svom blogu vidit je koliko je tebi Robinja u sercu.

- Ca govoriš za novi kip solara u Pag?

(foto:Valter Maričević)
- Obilježje jednoga grada su i njegovi kipovi. Kada san vozi tetu Mariju u Puntu Križa na Cres, ferma san se u Osor da vidim katedralu di je stolova zadnji njezni biskup Pažanin Rakamarić. Tako mali gradić najprije me oduševi koliko kipova i spomenika posjeduje. Dobiješ odma sliku maloga i kulturnog grada. Pag pomalo upotpunjuje tu kolekciju spomenika. Pratim feljton o Mirkoviću koga piše Ivo Pavina na svom blogu, znan da i ti pratiš pa san spomenu da kada već nisu napravili galeriju ku su obećali Mirkoviću, bilo bi lipo da mu podignu na Katine jednu spomen bistu da se baren tako odužiju ton velikom Pažaninu.

- Je Bebiću drago je i meni. Mi u Pag ima ca pokazat i imamo se čime dicit. Naša povijest ni siromašna i triba se time više bavit i judima pokazat sve ca imamo. Moreš ti pisat koliko očeš ali ako ne vidiš to ca se ima, uzalud ti je sve.
- To je velika istina ku si reka. Danas se nudi puno mogućnosti kulturnim i turističkim djelatnicima da prezentiraju svoj grad pa neka to iskoristiju.
Celo vrime san mu govori da gren ća jer da će pocet Fijumanka a da neću ništa slikat. Ni bi previše zadovojan sa time jer bi on bi do jutra čakula. Svaku malo nas neki prekine jer pasa puno judi Korzon ki nas poznivaju najviše od sporta. Sti je da govorimo o nogometu, sve smo mi to malo dotakli i naravno da nisan dospi na start regate. Isto san slika par slika da ne dojden doma praznih ruk.

Bilo mu je drago da smo se našli a meni još više. Gre on u Pag jer da više korone nima pa da je miran i prije svi Sveti da neće doć u Riku. Ca san mu moga drugo reć nego da se okupa i zamene.



Post je objavljen 13.06.2021. u 19:02 sati.