Pregled posta

Popeljuha Zaveljuha bajka hrvatskog primorja

Popeljuha Zavaljuha

Bil je jedan kralj I jako je lipo živel svojun ženun.Žena mu zaten jako oboleje I kad je videla da njoj već ni pomoći , da njoj je nabrzo umret, zazove svoga muža k sebe , pa mu reče :
-Mužu moj dragi, ja ću ti umret , to san sigurna, a ti si još mlad I oženit ćeš se. Ovo ti j’ moj prsten, a davajuć ti ga govorin ; prokljet bil ako drugu zameš leh onu koj bude ov prsten pristal
I kraljica umre. Kad je kralj odžaloval, da k sebe dozvat ‘se divojki iz grada, da vidi koj će prsten dobro stat ; ale prsten ne stoji nidnoj dobro.
Sad on raspiše po sen svojen kraljevstvu neka se gljeda koj će divojke ta prsten pristat, ali posvuda ne najde takve divojki.
Sad je ostala leh kraljeva kćer ka još ni provala prstena. Borme gredu I njoj provat. Kad tamo, noj najoblje pristine. Sad ni druga, leh oženiti kćer. Kćer se je na saki način otela te ženidbe oslobodit, ale kad je videla da si načini ne pomažu, reče svom ocu da te se oženit onput kad njoj donese sunčani halji. Kralj otac reče da će.
Projde iskat sunčene halji I donese njoj je.
Sad mu kćer reče neka njoj kupi mjesečeve halji.
Opet projde kralj iskat I donese njoj mjesečeve halji.
-Još mi morate donest zvezdane halji – reče kćer ocu – pa ćemo se onput oženit.

Kralj projde pa donese I zvezdane halji. Ča će sad kćer ? Ča god reče ocu, se njoj učini I se njoj donese. Vidi da već ni ča zatezat, a nikako se ne rad za oca oženila. Sad dojde k njoj sunce pa ju naputi, neka se one halji I sunčene I mesečne I zvezdane spravi va jednu škatulicu, zaten neka kupi jednu racu pa ju neka klade va vodu I va svojoj Kamari zapre ,a ona neka pobigne ono jutro kad bi se morala oženit.
Kćer posluša sunce, zapre halji, kupi racz, klade ju va vodu I zapre va svojoj kamare , I projde ča. To jutro ‘se se j’ već spravilo za pir, ‘se j’ već obučeno, leh još čekaju nevisticu. Projdu do njeje Kamari I naslišu ,a kako je raca va vode pljuskala , misleli su da se nevistica pere I obučiva. Borme već bilo kasno, bilo toga čekanja dosti, pa su šli sami va kamaru , a kad opaze racu va vode, valje se domisle ča je . Počeli ju iskat, ali ki znade kade j’ već ona bila!
Nakon više vrimena dojde ona kodi petljarica obučena pred kraljev dvor – va drugen kraljevstvu – I prosi neka bi ju zeli na konak I ako njin trebe kakova divica, da će ona služit. I zamu je va dvor više z milosrja leh za službu I daju njoj mesta za kuton med popelon.

Kraljev sin dojde jedanput na ognjišće da zapali cigar. A ona ne budi lena, ponudi mu z zakuta ognja. On pak zame lopatu pa ju udri po ruke I reče
-Ča ćeš ti mane davit ognja,Popeljuho Zavaljuho, tako blatna I nesnažna?
I prrojde, kad je cigar zapačič, ća.
Navečer da kraljev sin bal I velo veselje. Za to čuje I Popeljuha pa zaprosi gospodari da bi malo I nju pustili nab al, da vidi, kako će to biti. Borme ju puste. Ona se pak podmučeć obuče va sunčene halji, ke je bila va škatulice sobun zela, I projde nab al. Kad ju je kraljev sin opazil, vas se zažari I porumeni I zaželi ju valje za ženu. Niš ne govori, leh projde k njoj pa ju prosi neka gre s njim tancat. Ona projde s njin tancat. Kad je tanac fini, paita ju on da otkud je,a ona mu reče da je z Lopatova grada. I ča bi z okon maknul, nje već nestane. Kraljev sin gljeda, obrnja se, ali nje ni nigder . On sad žalostan ča je ona prošla, već ni otel z nidnen govorit I projde tako žalostan doma.
Jutradan dojde zamišljen opet na ognjišće da zapali cigar, a Popeljuha mu ponudi ognja.
-Ti Popeljuho Zavaljuho, kako mi moreš ti tako zamazana ponudit ognja? – reče on – zame popečak pa ju udre š njin po prsteh I projde ča.
Navečer je opet bil bal I veselje. Opet prosi Popeljuha neka ju puste na bal, da vidi kako će bit. Gospodari reku neka gre, kad se lipo nazad povrne I mirno se tamo ponaša kodi da je ne bi bilo.Sad ona obuče mesečeve halji, I dojde na salu I se se od nje zasvetli, a ona lipa da ćeš lipju. Opet ju kraljev sin zaprosi neka gre s njin tancat.Tanac se fini ,a on ju pita otkud je
-Ja san van ,kad ćete da znate, s Popeškova grada.
On se nekamo obrne ,a ona pobigne doma,suče se s halj I obuče svoje siromašne. Kraljev sin opet jako žalostan,ča mu je divojka pobigla I ni otel z nidnen govorit, leh valje projde spat.
Jutrodan opet dojde onako žalostan zapalit cigar. Popeljuha mu opet ponudi ognja.
-Ej, Popeljuho Zavaljuho – reče on – san ti tuliko put rekal da mi nimaš ti ognja davit! – Zame klješća pa ju š njimi udre po prsteh.
Opet je navečer bal. POpeljuha opet prosi da bi ju pustili da vidi kako će bit. Oni ju puste, a ona se obuče sad va zvezdene halji I dojde tako na salu. Kad ju kraljev sin opazil, dojde valje k sebe I razveseli se da ju opet more videt I odluči da ju večeras neće z ruk pustit, da mu kakogod opet ne pobigne. Tanca z njun I pita je otkud je,a ona mu reče da je s Klješćeva grada. On ju se čuva I drži da mu ne bi pobigla.
-Pustite me – reče mu ona – da rubac z žepa znamen.
-Ale morate zet od mane ov prsten, pa ću vas onput pustit – reče on njoj.

Ona zame prsten,on ju malo pusti nekamo leh oči obrne I nje već nestane bržje leh bi z okon maknul. Kraljev sin opet žalostan, tužan, z nidnen neće da govori, neće da ji I najzada oboli. Pita ljudi,znanci, prijatelji kade j ta Lopatov grad,raspišiva se, na se strain da bi morda ki zna, ali nidan. Pita za POpeškov grad,ni za njega ne zna nidan. Pita za Klješčev grad, još manje. Sad je on počel zdvajat, još jače oboli. Oboli borme nasmrt. Pepeljuha je za se to znala,pa kad je sinu mat kuhala juhu, zlomi ona prsten nadvoje I klade ga polovicu va zdelicu va koj mu mat juhu ponese. Na dnu zdelice najde on toga pol prstena. Sad se on razveseli I pita mater ki je juhu kuhal. Ona mu reče da ju j sama kuhala.
-A ki van je pomagal?
Nidan
Ki j bil blizu?
Nidan
Ma neki je moral bit blizu , recite mi, sakako mi morate povedat, aš od toga zavisi moje zdravje ale smrt.
Ma nidnoga ni bilo blizu - reče mu mat- leh će Pepeljuha za kuton.
Ako ni nidnoga bilo blizu leh ona, to zovite nju neka simo dojde.
Mat projde va kuhinju, pa reče Pepeljuhe da ju sin zove. Sad se ona obuče va sunčene halje I zasveli kodi sunce – takove divojki nip o sen široken svitu bilo. Dodje gori k sinu, a njemu valje on čas bilo bolje.
On ju pita kako je to došla za Pepeljuhu simo, kako se j to pretvarat mogla I tako naprvo.
Ona mu sad se poveje kako se j š njun I z ocen njejen dogodilo, kak j od oca pobigla – na bal došla,kako ju j on z lopatun udaril, a zato ona rekla, kad ju j na balu pital otkud je,da j z Lopatova grada I s se drugo. Kad mu j se to natanko povedala, prosi ju on za oprošćenje. Ona mu se oprosti,a on ozdravi I ožene se. Pa kakov je to bil pir tamo! Ni tičjega mleka ni njin falilo, zato I sad ljudi žele da bi se ono vrime povrnulo.

Post je objavljen 13.05.2021. u 14:18 sati.