Klara, jesi to ti? Booog. Jooooj, kak te dugo nisam vidla. Ideš malo k svojima? Jel slobodno? Ne čuvaš mesto za nekoga? Ne? Dobro, onda bum si ja tu sela. Baš mi je drago kaj sam te srela, da se moremo malo ispripovedati. A kak si mi ti? Jel su ti dobri nalazi? Jel ideš redovito na kontrole? Pazi, pazi na to. Ne smeš zakašnjavati ni odgađati. Da se ne bi ne daj Bože kaj dogodilo!?
A kak sam ja? Aaaa, tak, tak, znaš da nisam baš dobroga zdravlja. Tak sam ti umorna da je to čudo jedno. Stalno mi je nos zaštopan i grebe me f grlu. Nemrem normalno disati, a ne osetim ni mirise baš najbolje, stalno sam promukla i govorim nekak čudno kroz nos. Čuješ i sama. Čim ti počnem neke delati počnem disati kroz usta pa me peče f grlu i teško gutam. Nemrem spati i hrčem pa sam ti skroz neispavana. Veli moja doktorica da bi mogle dojti do upale grkljana i mandula, angine i kaj ti ga ja znam, a mogla bi veli i oglušiti. Poslala me k otorincu na pregled, pogledal mi je nos i glasnice s onom nekakvom žnoricom kaj na vrhu ima lampicu, pa veli da imam devijaciju septuma i da mi se zato nos zaštopava i glava me boli. Veli on da bi mogla iti na nekakvu operaciju da se to malo popravi, ta devijacija. Pitam ja njega a kaj je to taj septum, veli on to vam je pregrada između nosnica, građena od hrskavice i kosti, i da f idealnom slučaju prolazi kroz okomito središte nosa i ravnomjerno dijeli nosnice. A kod nekih ljudi taj septum more biti iskrivljen, asimetričan, tak ti je kod mene, a to ti je ta devijacija septuma. I veli ti on meni nek si to malo detaljnije pogledam na internetu. A niš, proguglam ti ja malo tu devijaciju septuma. Piše da iskrivljenje septuma more biti urođeno, a more se dogoditi tijekom rasta i razvoja u djetinjstvu ili zbog ozljede nosa. Možda sam razbila nos kad sam bila mala, ne znam, ne sečam se. Piše da to stanje može izazvati zdravstvene komplikacije i negativno utjecati na kvalitetu života, a more biti i popratnih komplikacija koje s godinama moreju biti sve teže. I piše da čak 80% ljudi nema idealno centriran septum, ali je iskrivljenje tak malo da opće nema nikakvih simptoma i da tu devijaciju ne treba ni liječiti.
I kaj da ti ja sad delam s tim? Ne znam. Nisam baš sigurna da bu ta operacija bilo kaj popravila. A niš, sve bum te nalaze odnesla svojoj doktorici da vidim kaj bu ona rekla.
Joooj kak sam gladna. Tak sam se žurila da ne zakasnim na ovaj vlak. Nisam stigla ni sendvič pojesti, još mi je f torbi. Idem si ga sad pojesti na miru. Imam i dva soka, oćeš jedan? Nećeš? Nisi žedna? A de smo sad, na kojoj smo stanici? Čim dojdem doma moram iti f bolnicu. Ko zna kak je Moj Štijef. Joooj, same da čuješ kaj se dogodile. Išel ti je prošla dva tjedna f šumu sa susedom seči drva. Zadnji dan dojde ti on doma i prejde odma gore f spavaču. Mislim si ja, valjda je umoran, nek si male leži. Zovem ti ja njega na večeru, več je bile pol osam, dojdi dole, spekla sam jajca na špeku, odi jest, de si tak duge, kaj si zaspal? Nema ti njega, ne javlja se. Idem ti ja gore pogledati kaj se događa, i imam kaj videti: Moj Štijef ti leži i ne miče se. Zovem ti ja njega i drmam, on se ne javlja, nemreš ga zbuditi, valjda je f nesvest opal. Zovem ti ja brže susedu f pomoč, ona ti je odmah zvala hitnu, dojurili oni za deset minut, brže ga pregledali, kisik na nos i kaj ti ga ja znam i odpeljali ga brže f bolnicu. A mene je suseda odpeljala za njima. Kad su ga napokon zbudili dojde doktor k meni i veli to vam je vjerojatno krpeljni meningo, kak je ono rekel, meningoence, vrag ga skelil, nekakvi ancefelitis, ne, encefelitis, ma nekakva virusna upala mozga, vrag bi ga znal. Fgrizel ga je krpelj f šumi i prenesel mu nekakve vražje viruse. Kaj ti misliš??!! Grozota jedna!! Isuse Bože!!! Mogel mi je hmrijeti!!
Post je objavljen 26.01.2021. u 18:46 sati.