Marketing
Kanaaada
Ne, nije mi zadrća prst na prvome samoglasniku pri pisanju domaćeg naziva zemlje javorovog lista, nego ako i napišen oni dugosilazni naglasak, samo Bog i Divica Marija Pričestiva znadu koji će znak bit prikazan na blogu.
Zato je ovakovi naslov ... ka ča san pisa u prošlome postu, nabralo se maslin, onako, ni malo ni puno.
Biće za našu potribu, a ostat će koja litra i za poklonit dragin ljudima 
Odonda su se masline točavale u slanoj vodi. Po starinsku bi bilo u moru, ali ko više more ovome moru virovat 
pa nan se voda iz špine uz dodatak šaku-dvi krupne soli, paške oli stonske ako je ikako moguće.
Jučer je bilo baš lipo vrime, bilo je grijota ostat doma, pa san malo proša uz more ... i nidir na granici Kambelovca i Gomilice se ukaza ovi prekrasan prizor ... dvi lipotice usidrene isprid stare Opatičke kuće, olitiga gomiliškoga Torca, kako ga danas zovu, a kako su ga zvali u „Game of Thrones“ niman pojma ... i pravo da van rečen, ni me ni briga 
... e, skoro san zaboravija napomenit, u kratkin san rukavima 
More, ajde, nije bilo baš ka uje, ali samo lagano namreškano ...
Jučer me je tokalo poć dežurat treću smjenu u mašogradskome DVD Mladost ... u nediju san pri sedan uri ujutreo doša doma, i uvatija se posla ...
Danas je bija dan o' maslin, šura Ante je nosija masline u uljaru, a mi ostali smo ostali doma spremat obid i kanaaadu, ča je starinski naziv za počastit se kad je uje došlo doma 
Obid više-manje, ništa spektakularno, malo mesa, prava juva i frigani kumpirići ... Zato smo se potrudili oko kanaaade, za zasladit umornin trudbenicima ...
Punica je spremila pršurate, koje mi u Mašogradu zovemo fritule, pa sa ona i ja uvik štocigajemo (podbadamo, za sjevernjake) oko tega ... otprilike ka i oko tega je li ono ča se peče za Uskrs sirnica oli trvenica
Živilo bogatstvo hrvatskoga jezika, ka i sve različitosti dijalekata unutar ovega našega Grada o' sedan seli 
Nisu bile samo pršurate/fritule/whatever ... bila je tot i pokoja palačinka ... bilo o' marmelade ...
... bilo o' Nutelle. Domaće ... koju san ja učinija od čikolatic „Životinjskoga carstva“, među ostalin ...
Sad kad je malo zazimilo, mogu is i malo češće učinit, samo ča ću Nutellu morat opet napravit, nije se puno zadržala
Zdravstveni bilten u užoj i široj fameji je više-manje OK, i neka tako i ostane.
Zdravi i veseli bili!!! 
Post je objavljen 08.11.2020. u 19:34 sati.