Pregled posta

CU SAN DA GOVORIJU !

Dogovorili smo se kada dojden od Praga da neću puno pisat, da ću nastojat odmorit se i doć sebi. Kada dojde vrime ili bude nešto važno, da ću cakod i napisat. Bi je kuntenti smanon i reka mi je da iman pravo, neka se odmorin da je to najvažnije. Cujemo se redovno, o svemu me izvještava, već je dva miseca doli i sve moguće informacije znan. Dva dana gren do grada, fali mi Musa, fali i Mateu, on je u Pag i nimaš sa kin popit kafu.

Svejedno smo ja i Mateo popili svoju cugu, kako rece Mateo i usput posjetili sajam knjiga „Vrisak“ ki se vaku godinu održava u Riku.

Ako ništa drugo za jeftini šoldi uvik najden neku knjigu ka me interesira. Sitili smo se i njega dok smo sedili, ja pijen makijato a Mateo satere dvi kuglice sladoleda. Gren ga zvat da vidin di je.
- Jesi poredi apartmani, se paričivaš za doć nazad ili će Te Dan mertvih uvatit doli?
- Ni vrag da si ugrad?
- Ne, Ti si!
- Pa ca cinite ugrad?
- Odnesli smo boršu popravit od škule Mateu, da mu zdricaju očali i usput da pojdemo na sajam knjiga.
- Knjige će ti kruva dat. Nego da te pitan, kako to da se ne bojiš korone?
- Više korone ima doli nego ovde u Riku. Ovo je najsigurniji grad u Hervatskoj po pitanju korone, najmanje zaraženih. Više ih je u Novaju i Metajnu nego u Riku.
- To imaš pravo i drago mi je da si doša do grada, to je šnjal da će bit dobro. Da ti pošajen baškotinov da moreš uz kafu mocit, jer makijato je bela kafa.

- Baš bi ti da kune za meni baškotini kupit i još poslat u Riku, to bi Tebi bi dodatni trošak.
- Bome nisi ti to slabo reka. Koludrice naplaćujeju baškotini na piz od zlata i još san cu da dvajset deki staviju manje u kilo. Da ti na peškariju staviju dvajset deki manje ribe a naplatiju ti za kilo, ja mislin da bi banak okrenu napak.
- Jesi Ti to dobro cu?
- Tako govoriju po Pagu i da su in baškotini toliko prozirni da sveti Vid moreš kroz njih vidit.

- Ja Ti to ne verujen, jer si Ti jedan takav muntanjor da samo cekaš kakav škerac od crikve da mi možeš kalat.
- Nisan ni ceka da ćeš drugacije reć. Ti bi se potuka za koludrice.
- Cekaj, cekaj. Ako je to istina to triba provjerit, zmirit baškotini kada ih kupiš i lipo in reć, a ne ovako kao i sve u Pag:- cu san da govoriju. Ca san ja sve cu.
- Dobro Bebiću, neka bude po tvoju, ali ja san tako cu, pa me sad ubi.
To je bila samo jedna od tema kih smo se dotaknuli. Još sam mu postavi nekoliko pitanja da se malo i nasmijen, fali mi smiha, pa smo u ton tonu nastavili.
- Cu san ja tako da na novoj pijaci prodaješ pemedevori od vertla.
- Kako ne, u Kiršinu iman vertal i u vertal svega ca ti serce poželi. Znaš kako smo dali ime vertlu?
- Ne!
- Plodine, tako ti se zove moj vertal. I kada dojdeš kod mene u vertal kupit pemedevori imaš organiziran parking, a ne ka na novoj pijaci.

- Baš lipo ali ja san tako cu.
- Jebi se, pa si mene naša danaska.
- Reka san Ti da ću možda doć za litnji karneval u Pag, ali ovogodišće je bilo samo za televiziju, pa se nisan sti dat štrapacat, cu san da si se Ti mašakara i da si bi glavni.
- Kako ne, ja san barjak nosi i „Baš nas briga“ napisa. Odi molin te živin Bogom, ostavi se mene. Ti si se zato raspisa za Krstu Jurasa.

- Ca možeš, kada je to nepoznat covik. Ki je taj? „Dalmacija u Tvon okuuuu.“
- Pivaj, pivaj turlavce. Sve jedno mi je žal za toga covika da se mi u Pag tako prema njemu odnosima. To je kultura na paški način. Glavno da Peruža svako lito tambura, njega ni korona ne more zaustavit.
- Ne fali meni paška kultura ni malo, niti oni ki je vodiju, da je baren malo više kulture u ton gradu svima bi nan bilo draže i lipše.

- Razepet će ju te sad za vo ca govoriš.
- Cu san da će kulturni radnici grada poduzet sve mjere da mi zabraniju ulazak u grad dok ne postanem kulturan i dok ne priznan sve ono ca oni ciniju za kulturu ovog našeg dicnog i šešnog grada. Živio paški litnji i zimski karneval! Jer zimski je sad bliže nego litnji i triba se parićat za taj kulturni događaj. Nego kumpanjo moj kada Ti misliš doć u Riku?
- Ca te briga. Kad me bude voja.
- Stoj ca duže možeš, jer san cu da si kovid pozitivan.
- Da ti recen na ca si ti pozitivan? Cuvaj toga maloga i ne gvori munješćine ispred diteta, nego mu kupi još jednu kuglicu sladoleda.

Morebit bimo bili još puno toga dotakli, ali su me zvali da je borša gotova i neka je dojdemo vazest. Platili smo dvi kuglice sladoleda i makijato 34 kune. Dvi knjige ke san kupi sam plati 20 kun pa ti sad budi pametan.




Post je objavljen 05.09.2020. u 22:52 sati.