Pregled posta

KORONA VIRUS

Kako ovaj vikend nisam bi dograda zna san da će se on javit telefonom jer ne bi sva ovo ludnica oko korona virusa pasala bez njegovih komentara. Da ne bi bilo kako on mene uvik zove gren ga jedan cas cut ca govori.
- Korona virusu ca cinis, jesi se testira?

- Aha, vo nisi ima koga nać nego mene.
- Da cujen ako si meju živima.
- Bebiću ja se deržin ca su stari judi govorili. Svako jutro bićerin travarice i dva cesna luka i ne boj se niti jedne bolesti.
- Morat ću provat tu Tvoju ricetu da vidim kako na meni djeluje. Nego reci Ti meni ca Ti se cini na svu ovu ludnicu.

- Bebiću, triba se cuvat. Jebiga, još bi sti malo poživit, ne moran baš od tog virusa partit, zato se deržin kuće. Moran Ti reć da mi je drago da ovaj narod ima toliko duha. Mislin na sve ovo ca se dogaja i da ni nimalo jednostavno, ali ima judi ki sve hitiju "na valcer". Koliko mi samo poruka dojde dnevno sa zajebancijon na korona virus? Ne more ovaj narod niti jedan virus, niti jedno zlo, slomit. Je se slažeš?

- Sve ca si reka, potpisujen. Koliko si me samo pjuca za zdravstvo, a ja san Ti uvik govori da nima šoldi ki moreju platit te jude za posal ki radiju. Mi smo svaki dan sa bolesnim judima. Vidiš Ti ki je ovo pothvat ovih judi. Ca ima drugog novog.

- Ca si ono pisa za brtvolin i to si krivo napisa. Ni niti bertvolin niti britvulin nego ovako kako san ti reka.
- Cu san i ja da se u Pag rece brtvolin i nidi nisan napisa da je jušto onako kako ja govorim, nego sam pozva evo i Tebe da receš da se možda drugacije rece. To je bogastvo besed.

- Dobro si to napisa Bebiću. Kad san pročita onaj drugi tekst o slikami onda mi je došlo uglavu ca si govori da ću ja pervi znat kada dojde vrime za to. Nisu stili štampat tu knjigu. A, ca ću ti reć? Namin u Pag ništa ne triba. Bilo bi lipo da te slike osvaneju na jedno misto, jer san siguran da i jedan i drugi imate bogastvo ko bi tribalo svitu pokazat.

- To ni moja briga. Mi smo in ponudili, a oni su rekli da kada dojdeju boja vrimena i kada se bude imalo šoldov da će nas onda imat u vidu. Ja san poce slikivat pocetkon sedandesetih godin, Ivo još i prije. Koliko je to godišć pasalo? Više od ceterdeset godišć. Koliko se toga u Pag prominilo? Koliko se toga uništilo i to vridnih stvari? Morebit se i radi toga bojiju. Kako ono u Pag receju? Nisu oni dostojni toga! Ja samo znan da kada mene ne bude da će to sve poć na Tartanovo, tamo će svima bit dostupno pa neka svaki uzme ca misli da će mu tribat.

- Baš mi je krivo, jer san siguran da bi puno njih ostalo bez daha kada bi vidili te slike. Ja san uspi dosta toga vidit kod tebe doma i nisan moga doć sebi ca sve i koliko toga imaš i uvik govorin ca bi smo mi sve imali da si živi u Pag. Ti i Valter zaslužujete da budete nagrađeni jer je to velika jubav prema svome gradu. Pred neki dan san čita u Novom listu kako je onaj stari u Baški na Kerk toliko godišća snima sa svojon kamerom i ca je općina ucinla da se taj materijal sacuva. Neki judi ki su gedali te filmove nisu mogli doć sebi kada su se vidili.

- Pustimo mi to na miru, morebit bude voje pa se to jedan dan i relaizira. Nego reci mi kako ste ono pasali na Rujevicu. U dvi utakmice šest golov. Dobar van je ovaj Tudor.
- Ne nažigaj me sada još i Ti. Bi san pogedat utakmicu i mogu Ti reć da san ja više vriđa Tudora nego navijači Rijeke. Ca je ki meju njima zna da ja navijan za Hajduka. Bilo me cram posli utakmice. Ka, kokoše su izgedali.
- Bit će boje kompanjo, morebit budete drugi, ki će to znat?!
- Ca cini Dondolaš?
- Bolestan je. Ni Korona virus, pi je antibiotik, sinusi su ga uništili.
- Neka se cuva.
- Cuvaj se i Ti kompanjo moj pa da se ca prije najdemo na kafu ugrad. Pozdravi drugaricu.
- Samo ti zajebavaj druže Plenkoviću.
- Ne zajebavaj jer uvik u tašku iman bertvolin lako Te rasporin.
- Brtvolin – Bebiću, brtvolin ne govori krivo.
- To Ti je po Vuku.
- More bit i po medvidu ali govoriš krivo.
- Neka bude po Tvome kako i svaki put, stoj mi dobro.



Post je objavljen 16.03.2020. u 22:28 sati.