Marketing
Maškarani Dan mirakuli
Sad kad odvrtin film unazad dvadeset i jednu godinu, na sićan se da je bilo ovako teplo za maškare ... kad bi iša pribirat po uspomenan, i dalje mi ne dolazidu prid možđane temperatuire koje nisu jednocifrene, da ne pričan o drugin atmosferilijama. Dosta mi je samo sitit se kako mi se pridlani duša smrzla a ruke pomodrile kad smo Vinka i ja išli na Murter gledat njiove maškare, kako is oni zovu „Murterske Bake“ ... Jutros je baš dan počeja sa mirakulima!
Reka san punici da se moran ranije ustat učinit spizu, jerbo su nji dvi u skuli i na poslu. Nije mogla virovat kad me je pri devet uri vidila kako san domaršira doli pod punon spremon ... ruka je zabolila od zlamenjivanja. Brzo san krenija, kupija sve ča triba, i povirija u prostoriju od maškar, vidit je li još ča triba učinit.
Je, triba in snimit muziku za u povorku. I nazdravija sa njima pelinkovcen ... asti Onega Gori, da ne rečen ča drugo ... bile su in veće oči nego u vuka iz priče o Crvenkapici ... reka san da ću in snimit novi albun Mate Bulića i uspija zatvorit vrata da me bačena čikopelnica (pepeljara, za sjevernjake) ne pogodi u škinu (kosti, za sjevernjake)
Trkon doma, čagod bacit u kjun, i snimit našu domaću, rekli bi zli jezici orjunašku, muziku ... ono, Mišo, Oliver, Karan, Grašo ... još jedan mirakul, na vrime san se uputija u Mašograd ... najprin san odnija našemu Sekretaru Buišu muziku na stiku ... taman san prispija izad Antikini Dvori kad su spremali kombi za povorku ... neke je pukla nostalgija za konobarskin vrimenima ...
... a neki/neke su uredno kontrolirali situaciju iz lože, ka Statler & Waldorf iz „Muppet Showa“ 
Kako san doša debelo na vrime ... jema san mista za parkirat se di me je bila volja ... a i za učinit koji selfi sa mojon frizerkon koja se već uputila na startno misto povorke ...
Kad već spominjen mirakule, vrime je bilo ka izmišljeno ... ka da je prid lito ... Mašo!
Zauzeja san misto u „Matele“ ... i fala lipa ovin dvima ženan/majkan/kraljican ča su mi pričuvale boršu sa opremon i jaketu, da se ja mogu komodno junačit u kratkin rukavima 
Učas je uz ćakulu prispila i povorka, pridvođena sa našin barjaktaron Baron Coton Kengijen ...
Išli su polako, pa san moga bacit oko i na svekoliko gledateljstvo ... bilo bi grijota ne slikat mislin najmlađega gledatelja maškarane mašogradske povorke, bar ono ča se ja sićan ...
Svaka povorka jema svoju krajicu, ali mi smo proširili priču... pohodija nas je poteštat (gradonačelnik, za sjevernjake) koji je u kočiji činija društvo našin krajican i carican 
Za njima je nastupija regularni dil povorke, najprin naš vrtlički podmladak ... male spaghetti bolognese ...
... mala dica u starinskin nošnjan svoji prabab i pradidov ...
... dica iz vrtliča „Sunce moje malo“ ...
... pa za njima dica malo starije dobi ča jema bit puno gledaju „Dnevnik“ ...
... ili oni ča već planiradu ča će bit kad narastedu ...
Ovi su isto na angrizu (riži, za sjevernjake) ... ali malo istočnije ...
za njima su nastupali nama uvik dragi gosti ... omiški gusari ...
Ekipa plesačica KOMA Kaštela je jemala pomno spremljen nastup, bilo is je gušt gledat, ka i uvik ...
Vranjičani ...
Naši dragi gosti iz Zapadni Kaštili su se zadnji godin pritvorili u riječki krnjeval, pa su nan opet poslali ekipu zbrda zdola, eto, da ne rečemo da nisu tili doć 
... Lepa Brena, reciklirana po ko zna koji put ...
Naši domaći iz KUD „Putalj“ su isto mašo gledali dnevnike po svin televizijan, i priporučuju nan ča triba duperat (koristit, za sjevernjake) da bi se obranili od svi virusi, ne samo od Corone ...
Za njima se dogegala „Madera“ ...
... di je standardna ekipa sidila u bašti i konzumirala napitke, okruženi lipin pitarima koje je Mare uvik sa ljubavlju zalivala ...
„Garaža Sućurac“ je na umjetnički način obradila temu inauguracije Predsajednika RH
... a Žuti jr. je zamalo odnija nagradu „Najbolje noge maškarane povorke“ ...
... sva srića da nisu pivali himnu 
Kakova bi to maškarana povorka bila bez najviše institucije zakonodavne vlasti u Lipoj Našoj ... sa isturenim zastupnicima manjina ...
... šoferima koji ništa ne vididu i ne čujedu ...
Ako ne ništa, bar su se osigurali od napada ISILovih terorista ...
Sa uzvišenog pijedestala festivala hrvatske demokracije, skalali smo se u surovu realnost, naša lokalna govna ... i metaforički i doslovno ...
... sa posebnin naglaskon na nagazne mine ča is ostavljadu naši „ljubimci“ ...
... a niko je triba to sve i očistit za njima ...
Na kraju, ali ne najmanje važan, nastupa On, Princ od Pogane Vlake ...
... personifikacija svi oni sa „dvojnin“ državljanstvon i rezervnon putovnicon, nek' se nađe ...
... počeli smo sa mirakulima, pa da nastavin ... OVI nije počeja bižat kad je vidija da ga slikajen ... čak mi je da, za ne povirovat, u ruke i njegov fotoaparat da ga slikan ...
... a ja san onda iskoristija priliku pa san zamolija jednoga od „dežurni“ fotografi da potegne nas dva kuma
Ajme! Gadno li će sneverat za koji dan ... nego, molajmo mi to, barenko za sada ... Princ od Pogane Vlake je doša na misto, pročitana mu je osuda ...
... pa su Jole i Babuje začas presudu i izvršili ...
Platija je za sve naše i svoje grije. Amen!
Ka i svake godine, prodava se leva-leva i „Mašogadur“, broj 19 ...
Nadan se da će koji ostat za ponediljak u „belu zgradu“ (Gradsku upravu Kaštela, za sjevernjake) ... a i kasnije, za razaslat po dijaspori
Večeras je na Sokolani maskenbal ... ali da prostite, nisan se ćutija (osjeća, za sjevernjake) baš najboje pa san se lagano uputija doma.
Jerbo san bija meknija snimat utakmicu Hajduk:Gorica (počelo u 15:00 ka i Povorka) pa nisan njanci povirija rezultat na internetu da činin fintu da gledan uživo.
I dočeka me finalni mirakul makar za ovi dan današnji ...
Hajduk je iskenda (izudara nogom, za sjevernjake) svoju „crnu mašku“ i to teniskin rezultaton ... neka Jakirović bude sritan da se igra samo jedan set
Valjda je dosta za danas ... Zdravi i veseli bili!!! 
Post je objavljen 22.02.2020. u 22:54 sati.